Ipeshkvijtë evropianë janë pranë bashkësisë kopte. Qeveritë të mbrojnë të krishterët
“Para ngjarjeve të ditëve të fundit në Kajro, të sigurtë se jemi të bashkuar në të
njëjtin Krisht, vdekur e ringjallur, si Ipeshkvij Evropianë, duam të pohojmë afërsinë
tonë me të gjithë qytetarët e Egjiptit e, në veçanti, me vëllezërit e bashkësisë së
krishterë kopte, të goditur këtyre ditëve nga një dhunë, që vret paqen, bashkëjetesën
ndërmjet feve, lirinë dhe dinjitetin e njeriut”. Ky është mesazhi i sotëm i kreut
të Këshillit të Konferencave Ipeshkvnore të Evropës, kardinalit Peter Erdë, i cili
u kërkon qeverive të vendeve evropiane të mbajnë qëndrim në mbrojtje të të gjithë
atyre, që, si të krishterët, pësojnë sulme thjesht për shkak të përkatësisë së tyre
fetare, etnike, ose shoqërore. “Prania e të krishterëve koptë në Egjipt – kujton
kardinali – është e lashtë sa predikimi i Shën Markut Ungjilltar e, që atëherë, bashkësia
e tyre është dhuratë për shoqërinë e për krejt Lindjen e Mesme. Qytetarë si gjithë
të tjerët, të krishterët impenjohen në ndërtimin e një shoqërie, që duhet të mbajë
vulën e lirisë, të drejtësisë, të së vërtetës e të dashurisë. Në këtë vend të dashur
– vazhdon Erdë – miqësia ndërmjet njerëzve me fe të ndryshme është shenjë shprese”. Kryetari
i ipeshkvijve të Evropës i lutet Zotit për të gjithë të krishterët e Egjiptit dhe
i kërkon Atij t’u japë forcë për të qenë gjithmonë dëshmitarë të vërtetë të Krishtit
e të vëllazërimit ndërmjet njerëzve, pa të cilin nuk mund të ketë të ardhme për njerëzimin.