Treguesi global i urisë në botë në rënie, por me prirje jo të njëjta
Treguesi global i urisë në botë ka rënë gjatë 21 vjetëve të fundit, por në masë të
vogël e në mënyrë jo të njëjtë për të gjitha vendet. Në pesë shtete afrikane (Burundi,
Komore, Bregu i Fildishtë, Republika Demokratike e Kongos, Svacilandi) dhe në një
aziatik (Koreja e Veriut) situata është keqësuar. Republika Demokratike e Kongos është
vendi, ku njerëzit vuajnë më shumë nga uria në botë. E ndjekin në këtë kalsifikim
dramatik, Burundi dhe Eritrea. Këto të dhëna janë rezultati i studimit “Treguesi global
i urisë” botuar në Itali nga “Link 2007”, grupi që përmbledh 10 ndër organizatat më
të rëndësishme jo qeveritare, në bashkëpunim me CESVI-n (Bashkëpunim e Zhvillim) dhe
me COSV-in (Koordinimi i Organizatave për Shërbimin Vullnetar). Studimi merr
parasysh tre tregues: përqindjen e personave pa ushqim, përqindjen e fëmijëve deri
në 5 vjeç nën peshë dhe vdekshmërinë foshnjore. Treguesi global është zvogëluar me
25% që nga viti 1990, por në 26 vende, ai arrin nivele alarmuese. Gjithashtu, në studim
pranohet se të dhënat janë të pjesshme. Raporti nuk merr parasysh gjendjen dramatike,
të krijuar pas thatësirës së Bririt të Afrikës, ku janë goditur veçanërisht Somalia,
Kenia, Etiopia, Gjibuti, Sudani dhe Republika e re e Sudanit Jugor. Studimi shqyrton
sidomos ndikimin negativ, që kanë çmimet e ushqimeve në jetën e përditshme të bujqve.
Rritja dhe ndryshueshmëria e çmimeve – vërehet – varen sidomos nga rritja e kultivimit
për biokarburante, nga spekullimi me lëndët e para e nga ndryshimet e klimës. Dhjetravjeçarë
përparime në luftën kundër urisë, nënvizohet në raport, rrezikojnë të shkojnë kot
para luhatjes së çmimeve.