Shugurimi ipeshkvnor i imzot Sciacca, sekretar i përgjithshëm i guvernatorit të Vatikanit
dhe izmot Adokonou, sekretar i këshillit papnor për kulturën
Sekretari i Shtetit të Vatikanit, kardinali Tarçizio Bertone, dje pasdite në Bazilikën
e Vatikanit, kryesoi Meshën e Shenjtë për shugurimin ipeshkvnore të imzot Giuseppe
Sciacca, emëruar ipeshkëv më 3 shtator, sekretar i përgjithshëm i Guvernatoratit të
Shtet- Qytetit të Vatikanit, e imzot Barthélemy Adokonou, emëruar ipeshkëv më 19 shtatorin
e kaluar, sekretar i Këshillit Papnor për Kulturën. Në homelinë e rastit, kardinali
Bertone kujtoi se dy prelatët “gjatë shërbimit të tyre meshtarak, zhvilluar së pari
në dioqezat e tyre përkatëse të vendlindjes e më pas në shërbim të Selisë së Shenjtë,
janë përpjekur ta duan Zotin mbi çdo gjë e të jenë shenjë e dashurisë së tij përdëllyese,
duke ushtruar bamirësinë baritore në dobi të vëllezërve. Për bamirësi baritore – shtoi
kardinali Bertone – nuk kuptojmë ndonjë virtyt që vepron në kuptimin moralist, por
në kuptimin teologjik: dashuria apo bamirësia baritore është një mënyrë e realizimit
të ngjarjes shpëtimprurëse të Dashurisë së Krishtit”. “Dy ipeshkvijtë e ri, që janë
formuar në shkencat juridike e teologjike, duke u pajisur me urti e përvojë të lartë,
që e vuan në shërbim të Kishës – nënvizoi kardinali Bertone – tani më shumë se kurrë
janë thirrur të transmetojnë dritën e doktrinës së dëftuar Hyjnore, në saje të misionit
e të mandatit hyjnor”. Së fundi, sekretari i Shtetit të Vatikanit ia besoi dy ipeshkvijtë
e ri ndërmjetësimit të Zojës së Bekuar Mbretëreshës së Apostujve që të jenë “lajmëtarë
të flaktë të Mbretërisë së Zotit, shërbëtorë bujarë të Kishës, bashkëpunëtorë besnik
të Vikarit të Krishtit, Papës”.