Ռուսիոյ Գրողներու Միութիւնը Հայ Ժողովուրդին Պիտի Նուիրէ Ալեքսանդր Բուշկինի Արձանը։
Ռուս մեծանուն գրող Ալեքսանդր Բուշկինի արձանը շուտով Մոսկուայէն պիտի տեղափոխուի Երեւան:
Ատիկա պիտի ըլլայ Ռուսիոյ գրողներու միութեան նուէրը՝ հայ ժողովուրդին: Այս մասին Հոկտեմբեր
3ին, Ռուսական խօսքի օրերու բացման ծիրին մէջ լրագրողներու հետ հանդիպման ընթացքին յայտնեց
Հայ-Ռուսական համագործակցութեան ներկայացուցչութեան ղեկավար, Հայաստանի մէջ Ռուսիոյ Դաշնակցութեան
դեսպանատան խորհրդական Վիքթոր Քրիվոփուսքով:
«Ռուսական խօսքի օրերու ծիրին մէջ
մտադիր ենք այցելել Հայաստան գտնուող «Բուշկինի հեղեղատ»ը, որ կը գտնուի Լոռիի մարզին
մէջ», նշեց ան: Ինչպէս յայտնի է, Լոռիի մարզի Գարգառ գիւղի մօտակայքը գտնուող հեղեղատին
մէջ Ա. Բուշկին տեսած է Պարսկաստանէն Ռուսիա տեղափոխուող Ալեքսանդր Կրիպոյետովի դիակը: Վ.
Քրիվոփուսքովի խօսքով, Երեւանի մէջ Բուշկինի արձանի տեղադրման մանրամասնութիւնները
տակաւին կը քննարկուին: Ան տեղեկացուց, որ Հոկտեմբեր 7ին Երեւանի մէջ պիտի բացուի Ռուսական
Գիրքի Խանութ, իսկ Մոսկուայի մէջ՝ Հայ Գրականութեան Տուն: