Papa në Engjëllin e Tënzot: kush është thirrur për të punuar në vreshtin e Zotit ka
përgjegjësi të madhe
Zoti ka planin e tij për njeriun, por shpesh përgjigjja e njeriut është mosrespektimi
i këtij plani: kështu foli dje Papa, gjatë Lutjes së Engjëllit të Tënzot në sheshin
e Shën Pjetrit në Vatikan. Benedikti XVI u ndal në shembëlltyrën e Ungjillit të djeshëm,
atë të vreshtarëve, që nuk i qëndruan besnikë të zotit të vreshtës, për t’u bërë thirrje
më pas besimtarëve të jenë të bashkuar me Krishtin, si dega me hardhinë. Ati i Shenjtë
kujtoi edhe figurën e motër Antonia Maria Verna, e cila u shpall e Lume dje pasdite,
dhe përshëndeti pjesëmarrësit e Kongresit Botëror të Mëshirës Hyjnore në Krakovi.
“Juve do t’iu
hiqet Mbretëria e Zotit dhe do t’i jepet një populli, që prodhon fryte”: ky qe citimi
i Ungjillit nga ana e Papës, i cili kujtoi paralajmërimin e Krishtit për krerët e
meshtarëve, që kishin përgjegjësi të madhe, pikërisht se ishin thirrur të punonin
në vreshtin e Zotit, si autoritete. Ati i Shenjtë u tërhoqi vëmendjen meshtarëve të
sotëm, të cilët kanë përgjegjësi para Zotit për mënyrën si e udhëheqin popullin e
Tij në rrugët e jetës së krishterë, pas gjurmëve të Krishtit. Jezusi, shpjegoi Benedikti
XVI, është guri, që ndërtuesit e hodhën, pasi e gjykuan armik të ligjit e të rrezikshëm
për rendin publik: “Por Ai vetë, i refuzuar e i kryqëzuar, u ringjall, duke
u bërë ‘guri i këndit’ mbi të cilin mund të mbështeten me siguri absolute themelet
e çdo ekzistence njerëzore dhe ato të botës mbarë”. Ja pra, se për cilën të
vërtetë flet shembëlltyra: pronari i vreshtit përfaqëson vetë Zotin, ndërsa vreshti
simbolizon popullin e Tij dhe jetën, që Hyji na e jep për të bërë të mira: “Zoti
e ka një plan për miqtë e vet, por fatkeqësisht, përgjigjja e njeriut orientohet drejt
mosbesnikërisë, që kthehet në refuzim. Krenaria dhe egoizmi na pengojnë ta njohim
e ta pranojmë edhe dhuratën më të çmuar të Zotit: Birin e tij të vetëm”. Zoti,
vazhdoi Papa, dorëzohet në duart tona, pranon të bëhet mister i papërshkueshëm i dobësisë
dhe e shfaq gjithë pushtetin e vet në besnikërinë ndaj planit të dashurisë, i cili,
në fund, parashikon edhe dënimin e drejtë për të këqinjtë. Këtu, Benedikti XVI u bëri
thirrje besimtarëve të sotëm: “Të patundur në fenë për gurin e këndit, që është
Krishti, të mbetemi të lidhur me Të, ashtu si dega, që nuk mund të sjellë fryte, nëse
nuk mbetet e lidhur me hardhinë. Vetëm në Të, për Të e me Të ndërtohet Kisha, popull
i Besëlidhjes së Re”. Zoti, theksoi Ati i Shenjtë, është gjithnjë afër nesh
e vepron në historinë e njerëzimit. Ai na shoqëron edhe duke na dërguar Engjëjt e
tij, që dje Kisha i nderoi si “Engjëjt e Rojes”. Që nga fillimi i jetës e deri në
vdekje, njeriu është i rrethuar nga mbrojtja e tyre e përhershme: “E Engjëjt
i thurin kurorë Mbretëreshës së Fitoreve, së Lumes Mari Virgjër të Rruzares, që në
të dielën e parë të tetorit, nga Shenjtërorja e Pompeit e nga bota mbarë, dëgjon Lutjen
përgjëruese e të zjarrtë, për fundin e së keqes e për zbulimin e plotë të mirësisë
së Hyjit”. Pas Lutjes së Engjëllit të Tënzot, Papa kujtoi lumnimin e djeshëm
të motër Antonia Maria Verna, kremtuar në Ivrea të Italisë nga kardinali-sekretar
i Shtetit të Vatikanit, Tarçizio Bertone: “Falenderojmë Zotin për figurën e
ndritur të së Lumes së re, shembull i gruas së shuguruar dhe i edukatores, që ka jetuar
ndërmjet shekujve XVIII e XIX”. Në çastin e përshëndetjeve, në gjuhën frënge,
Papa i ftoi profesorët t’u përçojnë nxënësve dashurinë për dijen e për të vërtetën.
Dija, nënvizoi Benedikti XVI, është e rëndësishme, por edhe më i rëndësishëm është
formimi i njeriut, që e bën atë në gjendje ta gjejë të vërtetën e të vendosë lirisht
për fatin e vet. “Edukojini të rinjtë me vlera të vërteta morale e shpirtërore,
që i ndihmojnë të gjejnë kuptimin e jetës”. Në anglisht e polonisht, Papa përshëndeti
pjesëmarrësit e Kongresit II Botëror të Mëshirës Hyjnore në Krakovi, ndërsa në italisht,
kujtoi nismën “Jezusi në qendër”, promovuar nga Baritoria rinore e dioqezës së Romës.
Bëri gjithashtu thirrje për zhdukjen e barrierave arkitektonike, të cilat u vështirësojnë
jetën njerëzve me të meta fizike, pikërisht në ditën, që Italia i kushton këtij argumenti.
Në fund, u dha të gjithëve Bekimin e tij Apostolik.