U bë i njohur programi i udhëtimit apostolik të Papës në Benin
Salla e Shtypit e Vatikanit publikoi programin zyrtar të udhëtimit apostolik të Papës
Benedikti XVI në Benin. Vizita, e 22-ta e papnisë, do të bëhet nga 18 deri më 20 nëntor,
me rastin e nënshkrimit e të publikimit të Këshillimit Apostolik post-sinodal, ku
përmblidhen reflektimet dhe propozimet e Sinodit për Afrikën të dy vjetëve më parë. Papa
do të mbërrijë në Kotonu, pasditen e 18 nëntorit e do të vizitojë menjëherë katedralen
e qytetit. Të nesërmen do të takohet me anëtarët e qeverisë, me përfaqësuesit e institucioneve
të Republikës, me Trupin Diplomatik dhe me përfaqësuesit e feve kryesore të vendit
në Pallatin Presidencial. Më pas, vizita e kortezisë te presidenti i Republikës. Që
këndej, Ati i Shenjtë do të shkojë në Uidah për t’u lutur te varri i kardinalit Bernardë
Gantin, për t’u takuar me meshtarët, seminaristët, rregulltarët dhe besimtarët katolikë.
Pastaj, do të shkojë në Bazilikën e Zojës së Papërlyer, ku do të nënshkruajë Këshillimin
Apostolik post-sinodal. Pasdite, sërish në Kotonu për një vizitë në vendstrehimin
“Paqe e gëzim” të Misionareve të Dashurisë, për takimin me fëmijët e më pas, me ipeshkvijtë
e Beninit. Të dielën, më 20 nëntor, në Stadiumin e Miqësisë, Papa do të kryesojë
Meshën, gjatë së cilës do t’u dorëzojë ipeshkvijve të Afrikës, Këshillimin Apostolik
post-sinodal. Pasdite, ceremonia e lamtumirës në aeroportin ndërkombëtar “Kardinali
Bernardë Gantin” të Kotonusë dhe kthimi në Vatikan.