Sot e dielë, 2 tetor, Kisha kremton të dielën e 27-të gjatë vitit kishtar e
gjithnjë sot kalendari kishtar përkujton edhe festën e Engjëjve të Rojës.
Nesër
e hënë, 3 tetor kalendari kishtar katolik përkujton shën Kandidën e shën Gerardin.
Të martën e ardhshme më 4 tetor do të përkujtojmë shën Françeskun e
Asizit, themeluesin e Urdhërit të françeskanëve, i mirënjohur dhe i nderuar në trevat
shqiptare.
Të mërkurën, 5 tetor, Kisha Katolike kremton festën e shën
Plaçidit e të shën Maurit, dishepuj të shën Benediktit, dhe shën Maria Faustina Kovalskën,
shpallur shenjtë nga Gjon Pali II.
Të enjten e ardhshme, kalendari kishtar
do të përkujtojë Shën Brunon nga Kalabria, meshtar, themelues i Çertozinëve.
Të
premten, më 7 tetor bie festa e Zojës Rruzare. Po më 7 tetor përkujtohen edhe
shenjtorët Sergji e Baku, martirë, shumë të nderuar nga populli shqiptar, të cilëve
u kushtohet edhe një nga kishat më të lashta në Shqipëri. Kisha ndodhet vetëm 40 minuta
larg qytetit të Shkodrës, pranë fshatit Shirq, ku lumi Drin bashkohet me Bunën. Muret
e saj kanë nisur të ngrihen në shekullin VI për nderim ndaj dy martirëve, emrat e
të cilëve në shqip morën trajtat Shën Shirqi e Shën Bahti.
Të shtunën e
ardhshme me 8 tetor kalendari kishtar përkujton shenjtoret Benedikta dhe Pelageja,
virgjëra e martire.
E diela e ardhshme është e 28-ta e vitit kishtar.
Kalendari na propozon shembullin e shën Dionisit, ipeshkëv e të shokëve të tij martirë;
të shën Gjon Leonardit, meshtar, themelues i Klerikëve Rregulltarë të Nënës së Zotit
dhe të shën Abrahamit, patriark.