Të nderuar Zonja dhe Zotërinj, Kur i kam drejtuar Këshillit të Konferencave Ipeshkvore
Evropiane ftesën për të mbajtur Asamblenë Plenare në Tiranë, kam mbajtur parasysh
dy gjëra: 1. Mesazhin që një mbledhje e tillë do t’i jepte Shqipërisë. E mesazhi është
ky: Kisha Katolike në Evropë e konsideron Shqipërinë, e theksoj, Shqipërinë e jo vetëm
Kishën Katolike në Shqipëri, si një pjesë të vyer të këtij kontinenti. 2. Mesazhin
që Shqipëria i jep Evropës. E mesazhi është ky: shoqëria njerëzore qëndron apo bie
në vartësi të kujdesjes për shpirtin e saj. Lartësimi i materiales në dëm të kujdesjes
për gjërat e përjetshme e çon njeriun dhe shoqërinë drejt një vdekjeje të ngadaltë.
Ne kemi pasur përvojën e materializmit marksist dhe kemi njohur zbrazëtinë shpirtërore
që ka shkaktuar, prandaj duam që Evropa ta dijë. Falënderoj Kryesinë e CCEE që na
ka dhënë këtë mundësi. Kjo mbledhje është e rëndësishme edhe për faktin se mund
të rizgjojë në shoqërinë tonë dëshirën për t’u njohur me Kishën. Tema e Asamblesë
Plenare është Ungjillizimi i Ri, që do të thotë tregim i ripërtërirë i të njëjtit
lajm të mirë të dashurisë së Zotit për njerëzit, që na ka zbuluar Krishti. Vendi ynë
është ungjillizuar që në shekullin e parë pas Krishtit. Ungjilli mund të shpallet
vetëm nga Kisha dhe, kur përqafohet, e përtërin Kishën. Ungjillizim i Ri në Shqipëri
do të thotë Kishë e ripërtërirë. Për një gjë të tillë ka nevojë të ngutshme shoqëria
jonë. Por si mund të bëhet ungjillizimi dhe si ripërtërihet Kisha? Nuk ka asnjë rrugë
tjetër pëveç asaj apostolike. Tregimi i ungjillit bëhet i mundur vetëm me anë të takimit
me të tjerët, takim që përfshin jetën tënde dhe prek jetën e tjetrit. Këtë ka bërë
Krishti me apostujt; këtë duhet të bëjnë të krishterët. Kjo përfshirje duhet të jetë
e plotë, deri në martirizim, sikurse ka ndodhur që herët në krishtërim, sikurse ka
ndodhur edhe së voni me të krishterët shqiptarë. Liria, që aq shumë kemi dëshiruar
dhe më në fund e kemi arritur. Ka nevojë tani për një ndjenjë përgjegjësie që buron
nga dashuria. Përqafimi i ungjillit e bën të përgjegjshme lirinë njerëzore. Për këtë,
ungjillizimi i ri është i rëndësishëm për Shqipërinë. Faleminderit.