Impenjimet e ardhshme të Papës, gjatë tetorit e nëntorit
Menjëherë pas vizitës në Gjermani, Papën Benedikti XVI e presin impenjime të tjera.
Gjatë muajit tetor, spikasin, vizita e Atit të Shenjtë më datën 9, në Lamezia Terme,
qytet i Italisë, ndërtuar vetëm 40 vjet më parë; Mesha për pjesëmarrësit e Takimit
dy ditor, organizuar nga Këshilli Papnor për Ungjillëzimin e Ri, të dielën, 16 tetor;
ngritja në nderimet e elterit si shenjt i Kishës Katolike për të Lumin Guido Maria
Konforti, themelues i Saverianëve, për të Lumin don Luigji Guanela, meshtar i madh
për hir të impenjimit të tij për më të varfërit dhe për të Lumen Bonifacia Rodrigez
Kastro, themeluese e Motrave Shërbëtore të Shën Jozefit; së fundi, lutja e përgatitjes
për Takimin e Asizit, të mërkurën, më datë 26, në sheshin e Shën Pjetrit në Vatikan.
Papa do të shkojë të nesërmen në Asizi për Ditën e reflektimit e të lutjes për paqen
e dialogun në botë, së bashku me përfaqësues të feve të tjera të krishtera e jo, sipas
frymës, që i ka dhënë këtij takimi, themeluesi i tij, i Lumi Gjon Pali II. Muaji
nëntor për katolikët, karakterizohet nga nderimi për të afërmit e vdekur, me shpresën
se janë pranë Atit të Gjithpushtetshëm. Edhe Papa, ashtu si të gjithë besimtarët,
lutet për paraardhësit e vet. Kështu, të mërkurën, më 2 nëntor, në ditën e përkujtimit
të të vdekurve, Benedikti XVI do të lutet për Papët e mëparshëm, në Varret e Bazilikës
së Vatikanit, në orën 18.00. Edhe të nesërmen, ditën e enjte, Papa do të kremtojë
një meshë për shpirtin e të gjithë kardinajve dhe të ipeshkvijve, që janë ndarë nga
kjo jetë gjatë këtij viti. Të premten, më 4 nëntor, Jozef Racinger, ish-profesori
i teologjisë, do të kryesojë Lutjen Mbrëmësore për fillimin e Vitit të ri Akademik
në Universitetet Papnore. Pa dyshim, kulmi i veprimtarisë së Papës gjatë nëntorit,
do të jetë udhëtimi i tij apostolik në Benin të Afrikës, nga 18 deri më 20 nëntor,
me rastin e 150-vjetorit të ungjillëzimit të vendit. Por le të ndalemi pak në
udhëtimin më të afërt të Atit të Shenjtë, atë në Lamezia Terme në Kalabri, më 9 tetor.
Programi i vizitës u bë i njohur sot. Me të arritur në aeroportin e qytetit, Papa
do të shkojë në periferinë industriale për të kremtuar meshën dhe për të thënë Lutjen
e Engjëllit të Tënzot, së bashku me popullsinë. Pasdite, në orën 16.30 do të përshëndesë
organizatorët e vizitës e do të shkojë me helikopter në Çertozën e Serra San Brunos,
gjithnjë në Kalabri, ku do të përshëndesë popullatën në sheshin e Shën Shtjefnit,
pikërisht para Çertozës. Benedikti XVI do të kremtojë Lutjet Mbrëmësore së bashku
me çertozinët e me besimtarët në orën 18.00. Më pas, do të takohet me bashkësinë e
çertozinëve dhe do të vizitojë një qelë e infermierinë e Çertozës, për t’u kthyer
në Romë, po të dielën, më 9 tetor. Kujtojmë se Urdhëri i Çertozinëve, themeluar
nga Shën Bruno në vitin 1084 në Francë, është urdhër murgar kundrues. Çertoza s’është
tjetër, veçse kuvendi, ku murgjërit jetojnë si eremitë, në bashkësi të vogla. Përveç
lutjeve të ditës, në vetmi e në klauzurë, murgjërit çohen edhe dy herë natën për ta
lutur Zotin për të gjithë njerëzit.