Benedikti XVI pas kthimit nga Gjermania: kam besim në të ardhmen e krishterimit
Papa Benedikti XVI përfundoi mbrëmë udhëtimin e tij në Gjermani, ku vizitoi Berlinin,
Erfurtin dhe Frajburgun. Gazetat gjermane, aspak entuziaste para kësaj vizite, komentonin
sot me tone mirëdashëse e me respekt katërditëshin e Atit të Shenjtë dhe fjalët, që
u drejtoi bashkëkombasve të vet. Na pëlqen këtu
të përmendim çastin, kur Papa citoi fjalët e bijës së madhe të kombit shqiptar, së
Lumes Nënë Terezë, marrë si shembull pikërisht në takimin e djeshëm me katolikët e
impenjuar në Frajburg, për t’u thënë atyre dhe mbarë botës se Kisha duhet të largohet
nga gjërat materiale, për të qenë më besnike ndaj Ungjillit e për t’iu përgjigjur
etjes së njerëzve për Zotin. Benedikti XVI kujtoi se si dikujt, që e pyeste cila ishte
gjëja e parë për t’u ndryshuar në Kishë, Nënë Tereza i përgjigjej: “Ju dhe unë”. E
Papa komentoi: “Ky episod i vogël na bën të qarta dy gjëra: nga njëra anë, rregulltarja
dëshiron t’i thotë bashkëbiseduesit se Kisha nuk janë vetëm të tjerët, nuk është vetëm
hierarkia, Papa dhe ipeshkvijtë: Kishë jemi ne të gjithë, të pagëzuarit. Nga ana tjetër,
ajo niset nga premisa se ekzistojnë arsye për ndryshime. Ekziston nevoja e ndryshimeve.
Çdo i krishterë dhe krejt bashkësia e besimtarëve është e thirrur ta kthejë vazhdimisht
zemrën kah Zoti”. Gjatë ceremonisë së lamtumirës në aeroportin e Lahrit, Ati
i Shenjtë përshkoi edhe një herë etapat kryesore të udhëtimit apostolik. Fillimisht,
vizita në Parlamentin gjerman: “Në Berlin, pata
rastin e veçantë të flas para parlamentarëve të Deutscher Bundestag dhe t’u paraqes
atyre disa reflektime mbi bazat intelektuale të shtetit”. Papa kujtoi edhe
bisedimet e frytshme me presidentin gjerman Vulf dhe me kancelaren Merkel e pastaj,
vuri në dukje rëndësinë që pati tema e ekumenizmit dhe e dialogut ndërfetar në këtë
udhëtim: “Këtu, dua të përmend takimin me përfaqësuesit e Kishës Evangjelike
në Gjermani në ish-kuvendin augustinian të Erfurtit. Jam thellësisht mirënjohës për
shkëmbimin vëllazëror dhe për lutjen e përbashkët”. Por vizita kishte si qëllim
edhe përforcimin në fe të katolikëve gjermanë, të cilët kanë kaluar nëpër dy diktatura,
atë naziste e atë komuniste: “Ashtu si në vizitat e mëparshme, mundëm të shihnim
sa njerëz dëshmojnë këtu fenë e tyre dhe e bëjnë të dukshme forcën e saj shndërruese
në botën e sotme”. Benedikti XVI kujtoi me gëzim, dashurinë me të cilën e rrethuan
të rinjtë në lutjen mbrëmësore të Frajburgut, ku përmendi Ditët Botërore të Rinisë
në Madrid. Që këtu, inkurajimi i Kishës në Gjermani që të vazhdojë me forcë e besim
rrugën e fesë, e cila i kthen njerëzit në rrënjët e veta, në thelbin e Lajmit të Mirë
të Krishtit: “Nga kjo përvojë rritet siguria se “Ku është Zoti, atje është e
ardhmja”. Aty ku Zoti është i pranishëm, aty ekziston shpresa e hapen perspektiva
të reja, shpesh të papritura, që shkojnë përtej së sotmes e gjërave dytësore”.