Kryeqytet i Gjermanisë Federale dhe “Land” (Qytet-shtet), me 3.429.870 banorë. U krijua
në shekullin XII si një qendër e vogël tregtare, me origjinë sllave. Në shekujt e
mëvonshëm fitoi më shumë rëndësi se qytetet e tjera të Brandenburgut. Berlini ishte
kryeqytet i Gjermanisë edhe në periudhën naziste dhe për këtë arsye, u bë objektivi
kryesor i bombardimeve aleate gjatë Luftës së dytë Botërore deri më 8 maj 1945. Pas
luftës Berlini u nda në katër zona pushtimi dhe si rrjedhim në dy zona influence :
Berlini perëndimor, dhe Berlini lindor, që i takoi sektorit sovjetik. Berlini lindor
u bë kryeqytet i Republikës Demokratike Gjermane. Lufta e ftohtë ndërmjet dy blloqeve,
atij perëndimor, të kryesuar nga SHBA-të dhe, atij lindor, të kryesuar nga Bashkimi
Sovjetik, filloi pikërisht në kryeqytetin gjerman, me “bllokimin e Berlinit, pas përpjekjes
perëndimore për të bashkuar të dyja pjesët, së cilës Moska iu përgjigj me mbylljen
e të gjitha kalimeve rrugore e hekurudhore (qershor 1948 – maj 1949). Në vitin 1961,
u ngrit muri i famshëm i Berlinit, që nuk lejonte kapërcimin e kufirit. Në vitin
1963, Nikita Hrushovi, kreu i Bashkimit Sovjetik vizitoi Berlinin Lindor, më 17 qershor.
Nuk vonon përgjigjia e amerikanëve: më 26 qershor, presidenti Xhon Kenedi shkon në
Berlinin Perëndimor, për të shqiptuar aty fjalimin historik, në të cilin deklaron
“Ich bin ein Berliner”(Unë jam berlinez). Histori të dhimbshme qenë protagonstet e
jetës në të dyja anët e qytetit, deri më 9 nëntor 1989, kur populli shembi murin e
Berlinit, duke shënuar edhe fundin e ndarjes së Evropës e të botës në blloqe e fundin
e komunizmit lindor. Gjermania Federale do të krijohej më 3 tetor 1990. Papa i lum
Gjon Pali II ka qenë për vizitë tri herë, por vetëm në vitin 1996, në Gjermaninë e
bashkuar.