Հայ Ջութակահար Հրաչեայ Աւանեսեանի Ելոյթը Ճաբոնի Մէջ։
Սեպտեմբեր 15ին Ճաբոնի մէջ Հայաստանի Դեսպանութեան նախաձեռնութեամբ եւ հովանաւորութեամբ,
Թոքիոյի հեղինակաւոր համերգասրահներէն մէկուն մէջ` “Asahi Hall” ի մէջ տեղի ունեցած է
հայ անուանի ջութակահար Հրաչեայ Աւանեսեանի ելոյթը: Ձեռնարկին որ ընդգրկուած էր Հայաստանի
Հանրապետութեան անկախութեան 20-ամեակին նուիրուած հանդիսութիւններու ցանկի մէջ, ներկայ
եղած են Ճաբոնի կառավարութեան բարձրաստիճան պաշտօնեաներ, խորհրդարանի պատգամաւորներ,
երկրի մէջ հաւատարմագրուած դիւանագիտական առաքելութիւններու ղեկավարներ, յայտնի գործարարներ,
մշակութային եւ գիտական կառոյցներու ներկայացուցիչներ: Հրաչեայ Աւանեսեանի կատարմամբ
հնչած են հայ եւ եւրոպացի երաժշտահաններու ստեղծագործութիւններ, հայկական ժողովրդական
մեղեդիներու մշակումներ, որոնք մեծ խանդավառութեամբ եւ բերկրանքով ընդունուած են ճաբոնացի
հանդիսատեսի կողմէ: Հայ արուեստի ուժը լաւագոյնս արտայայտուած է ոչ միայն տաղանդաշատ
ջութակահարի երաժշտութեամբ, այլեւ այն հանգամանքով, որ Ճաբոնի մէջ համերգ ունենալու առիթով
միջազգային հիմնադրամներէն մէկը անոր վստահած էր իտալացի մեծ վարպետ Անթոնիոյ Ստրադիւարիուսի
1717թ. պատրաստած գործիքը: