Ungjillëzimi i ri në qendër të fjalëve të Papës, i cili në Lutjen e Engjëllit të Tënzot
shprehu gëzimin për udhëtimin në Gjermani e theksoi të drejtën e të gjithëve për studim
“Sot jetojmë në epokën e ungjillëzimit të ri”: kështu tha Papa, gjatë Lutjes së Engjëllit
të Tënzot, dje në Kastel Gandolfo, nga ku i ftoi njerëzit, familjet e bashkësitë të
punojnë në Vreshtin e Zotit. Pasuan reflektime mbi shkollën e mbi të drejtën e të
gjithë personave për studim e arsim. Fjalë gëzimi edhe për udhëtimin në Gjermani,
që do të fillojë të enjten.
“Horizonte
të mëdha hapen për shpalljen e Ungjillit, ndërsa rajonet me tradita të lashta të krishtera
janë të thirrura të rizbulojnë bukurinë e fesë”. Duke u nisur nga Letra e Shën
Palit drejtuar Filipianëve, që liturgjia propozonte dje, Papa kujtoi se Apostulli
i Popujve shkruante: “Për mua, jeta është Krishti”. E duke i ftuar të gjithë të impenjohen
për ungjillëzimin e ri, Benedikti XVI nënvizoi se protagonistët e këtij misioni janë
ata, që mund të thonë të njëjtën gjë: “Persona, familje, bashkësi, që pranojnë
të punojnë në vreshtën e Zotit, sipas imazhit të Ungjillit të kësaj së diele… Punëtorë
të përvujtë e bujarë, që nuk kërkojnë tjetër shpërblim, përveçse pjesëmarrjes në misionin
e Jezusit e të Kishës”. Papa tregoi besimin e tij të patundur, se ashtu si
në të kaluarën, Ungjilli i Krishtit do të vazhdojë ta ndryshojë e ta shndërrojë botën,
pasi bashkimi me Jezusin na shtyn t’i japim kuptim të ri jetës, na jep shpresa të
reja: “Vdekja dhe ringjallja e Tij përbëjnë Lajmin e Mirë që, duke u nisur nga
Jeruzalemi, është i destinuar të arrijë tek të gjithë njerëzit e popujt dhe t’i shndërrojë
nga brenda të gjitha kulturat”. Edhe shën Pali, tha Papa, kishte në vetvete
tri botë: atë hebraike, atë greke e atë romake. Jo më kot, Zoti ia besoi pikërisht
atij, misionin e përhapjes së Ungjillit nga Azia e Vogël në Greqi e më pas në Romë,
duke hedhur kështu një urë, që do ta çonte krishterimin deri në kufijtë më të skajshëm
të tokës. Pas Lutjes së Engjëllit të Tënzot, Ati i Shenjtë kujtoi të Lumin e ri
të Shoqërisë së Meshtarëve të Shën Jozef Kotolengos, imzot Françesko Palearin, që
u shpall dje i Lum në Torino të Italisë: “Ia kushtoi jetën të varfërve dhe të
sëmurëve të Shtëpisë së Vogël të Provanisë Hyjnore, por edhe mësimdhënies, duke u
dalluar për butësinë e durimin e tij. Lavdi Zotit për këtë dëshmitar të ndritur të
dashurisë së Tij!”. Pastaj, përshëndetjet në gjuhë të ndryshme: në frëngjisht,
një mendim i çmuar për studentët e prindërit e tyre: “Vitet e shkollës janë
shumë të rëndësishme për të zgjeruar fushat e dijes dhe për të mësuar si të jetojmë
me të tjerët”. Papa i ftoi prindërit të ndjekin me vëmendje e nga afër fëmijët,
t’i dëgjojnë e të flasin me ta për problemet e përditshme, në mënyrë që t’i ndihmojnë
të marrin vendime të përshtatshme për zgjidhjen e tyre. Familja e shkolla janë terreni
ku formohet njerëzimi i nesërm, theksoi Benedikti XVI, duke bërë thirrje që çdo fëmijë,
të mund të ketë arsimin, që i takon me të drejtë. Në gjermanisht, një mendim për
udhëtimin në Gjermani, nga 22 deri më 25 shtator: “Pres me gëzim të takohem
me shumë njerëz në atdheun tim”. Papa i ftoi të gjithë t’i përgjigjen me bujari
dashurisë së pafundme të Zotit e të bashkëpunojnë për të mirën e botës.