Atë Lombardi mbi udhëtimin e Papës në Gjermani: “E ardhmja dhe Zoti”
Nga data 22 deri më 25 shtator, Papa Benedikti XVI do shkojë për vizitë apostolike
në Gjermani. Do të jetë një udhëtim i përqendruar mbi ungjillëzimin e ri, të cilin,
jo më kot, Ati i Shenjtë dëshiron ta fillojë nga atdheu i vet, ku duket se shtohen
gjithnjë e më shumë ateistët e ku njerëzit e kanë humbur besimin në të ardhmen. Komenti
javor i sotëm i zëdhënësit të Vatikanit, atë Federiko Lombardi shpjegon “pse”-të e
këtij vendimi të Papës. Ta dëgjojmë: “Jetojmë në kohë të shqetësuara për të
ardhmen, për atë të planetit Tokë e të jetës mbi të, për atë të ekonomisë botërore
e të paqes ndërmjet popujve, për të ardhmen e Evropës dhe të kombeve që e përbëjnë,
për atë të të rinjve e të fëmijëve që tani i buzëqeshin jetës. Duke shkuar në vendin
e vet, në Gjermani, që shumë e shohin sidomos si lokomotivën e kontinentit të vjetër,
por ku feja e krishterë duket se po shuhet me shpejtësi, Papa ka zgjedhur për udhëtimin,
këtë moto: “Ku është Zoti, aty është e ardhmja”. Janë fjalët kyçe të homelisë së tij
në Shenjtëroren austriake të Mariacelit, para katër vjetësh, kur e interpretoi krizën
demografike në Evropë si shenjë e mungesës së besimit në të ardhmen e ku pati thënë:
“Pa të ardhme do të jetë globi vetëm kur të shuhen forcat e zemrës njerëzore e të
arsyes së shndritur nga zemra – vetëm kur fytyra e Zotit nuk do të shkëlqejë më mbi
Tokë. Ku është Zoti, aty është e ardhmja”. Nga dita e parë e zgjedhjes
në fronin e Shën Pjetrit, Papa Benedikti XVI na ka shpjeguar se shpallja e primatit
të Zotit do të ishte përparësia e papnisë së tij. Kush është Zoti? Si ta shohim fytyrën
e Tij? Ku ta takojmë e si të flasim me Të? Marrëdhëniet me Zotin, si e orientojnë
jetën e çdo njeriu e përgjegjësia e tij në shoqëri, a nxit kërkimin e drejtësisë e
të të drejtave? Zoti nuk është i huaj për jetën. Nuk duhet të presim nga
Papa përgjigje për çështje dytësore, por për ato më thelbësoret. Duke përshkuar një
vend, ku mohimi totalitar i Zotit ka dëshmuar pasojat e tij më të skajshme, do të
reflektojmë së bashku si të impenjohemi – si njerëz, si besimtarë në Hyjin, si të
krishterë e si katolikë – për të ndërtuar një të ardhme të denjë për njeriun”.