“Ойча Наш! Каторы
ёсць у небе, свяціся імя Тваё…” Ужо некалькі дзён, з 12 верасня, жыхары і госці Іерусаліма
могуць прачытаць галоўную хрысціянскую малітву на беларускай мове. Табліца з малітвай
па-беларуску з’явілася на сцяне аднаго з самых вядомых і знакамітых касцёлаў Святой
Зямлі – “Pater Noster” – з латыні назва дакладна і перакладаецца як “Ойча Наш!”. Яшчэ
гэты храм называюць Касцёлам Нацый, таму што на яго сценах ужо размешчана каля 130
табліц з галоўнай малітвай хрысціянства на нацыянальных мовах. Але тэксту па-беларуску
да гэтага часу не было. Як паведаміў пробашч архікатэдральнага касцёла Імя Насвяцейшай
Панны Марыі кс. Антоні Клімантовіч, 2 гады таму таму, падчас пілігрымкі, узнікла думка
ўсталяваць “нашу” табліцу. Аўтарам ідэі з’яўляецца арцыбіскуп Тадэвуш Кандрусевіч.
Зрабілі
табліцу мясцовыя ізраільскія майстры. Кераміка, надпіс па-французску “Belarusse” уверсе,
прыгожы нацыянальны арнамент па перыметру. Памер даволі вялікі – 2 метры ўвышыню і
1 метр 20 сантыметраў ушырыню. Нягледзячы на тое, што на сцяне храма засталося вельмі
мала свабоднай плошчы. На ўрачыстасць асвячэння табліцы, якая пройдзе 25 кастрычніка
ў Іерусаліме адправіцца шматлікая беларуская дэлегацыя – 200 чалавек. З’яўленне беларускамоўнай
табліцы мае вялікае значэнне не толькі ў рэлігійным, але і культурным аспекце.
Таму,
можна казаць, што цяпер беларускія католікі ўголас і на роднай мове паведамілі аб
сабе ўсяму хрысціянскаму свету, гісторыя якога пачынаецца ў гэтым святым месцы. Бо
менавіта тут, калі апосталы папрасілі Хрыста навучыць іх маліцца, Ён першы раз прамовіў
гэтыя словы – “Ойча Наш! Каторы ёсць у небе…”