Në Orisë të Indisë u tërhoq urdhëri për shkatërrimin e kishave
Asnjë kishë e Kandhamalit në Orisë të Indisë nuk do të shkatërrohet. Lajmin e dha
përgjegjësi i zonës, Rajesh Prabhakar Patil, gjatë takimit me delegacionin e krishterë
të vendit. Gjithsesi, kryeipeshkvi i qendrës shtetërore të Orisës deklaroi se garancitë
verbale nuk mjaftojnë, pasi nuk i ndalin funksionarët lokalë. Në gusht, në përvjetorin
e pogromit kundër të krishterëve në Kandhamal, qeveria urdhëroi shkatërrimin e pesë
kishave, me pretekstin se vendet e kultit, të ndërtuara që në vitin 1942, ishin ngritur
në terren shtetëror, pa autorizimet përkatëse. Urdhëri i përgjegjësit aktual të
zonës mbërrin vonë, për shembull, për famullinë e Betikolës, prej kohësh në shënjestër
të fondamentalistëve hinduistë. “Ekstremistët - kujton kryeipeshkvi, imzot Barua –
i ndiqnin meshtarët dhe i rrihnin kur ktheheshin nga punët e tyre baritore”. Sot,
famullia nuk ekziston më. Fat më i mirë i takon kishës së Nandaxhirit, ku që nga qershori
i vitit 2009, qeveria ka rivendosur aty 54 familje katolike dhe 17 pentekostale, të
shpërngulura pas dhunës kundër të krishterëve në vitin 2008.