Në zbulim të Kopshteve të Vatikanit mund të shkohet edhe me minibus: iniciativë origjinale
e Veprës Romake të Shtegtimeve
Për shekuj të fshehur pas mureve të larta të Shtetit të Vatikanit, Kopshtet e Papës
i hapin dyert për turistët dhe për shtegtarët e të gjithë botës. Vizita në “zemrën
e gjelbërt” të Vatikanit tani, është e mundur me minibusin e Veprës Romake të Shtegtimeve,
në bashkëpunim me Guvernatoratin e Shtetit të Vatikanit. Risia u paraqit sot për shtypin
me një xhiro përurimi në Kopshtet me famë botërore. Si lindi kjo ide dhe si do të
realizohet? Pyetëm përgjegjësen e Zyrës së Shtypit të Veprës Romake të Shtegtimeve,
Elena Gracini: Lind nga dëshira për t’u dhënë mundësinë të gjithë personave,
që vijnë në Romë, të shohin bukuritë e Kopshteve të Vatikanit. Kjo gjë mund të bëhej
edhe më parë, në këmbë, por tani mund të bëhet edhe ndryshe, me autobuza të vegjël
të hapur. Mund të vijnë vërtet të gjithë. Një shtegtim sugjestiv! Cilat do
të jenë bukuritë, që mund të shohin njerëzit? Duke filluar nga sheshi i Shën
Martës e duke u ngjitur lart, ka një sërë ikonash të mrekullueshme. Nuk mund të mos
kujtoj se ndërsa admirohet Kupola e Shën Pjetrit, shihet Shpella e Lurdës në Vatikan.
Parashikohen edhe ndalesa, si për shembull, para Tempullit të Zojës së Rojes, ose
te Zoja e Fatimës, apo te ajo e Guadalupes… Pra, ka vërtet pika ku prania mariane
është e fuqishme. Në ndalesa të tjera, si për shembull, para selisë së Radio Vatikanit,
në Hekurudhën e Vatikanit etj., u jepet vërtet mundësia njerëzve të zhyten në botën
e Kopshteve. Ndër shumë bukuri, po kujtoj edhe Shatërvanin e Shqiponjës, në mes të
gjelbërimit… Personi që ka ndërmend të vijë për të parë, me këtë mënyrë, Kopshtet
e Vatikanit, ç’duhet të bëjë dhe sa kushton bileta? Ne i presim në zyrat tona
në Romë, ku mund të blihen biletat, në veçanti në zyrën e Sheshit të Shën Pjetrit.
Kostoja për të rriturit është 12 euro plus tre për prenotimin, për fëmijët 8 euro,
ndërsa për të vegjlit nën moshën 6 vjeçare, hyrja është falas.