15 верасня - Міжнародны дзень дэмакратыі

15 верасня ў свеце адзначаецца Міжнародны дзень дэмакратыі. З гэтай нагоды, генеральны сакратар ААН Пан Гі Мун звярнуўся з спецыяльным пасланнем, у якім адзначыў, што гэты год з’яўляецца вельмі незвычайным для дэмакратыі. “Міліёны людзей прынялі ўдзел у драматычных падзеях на Блізкім Усходзе, Паўночнай Афрыцы і іншых рэгіёнах, а таксама яшчэ большая колькасць з вялікай зацікаўленасцю сачылі за тым, што там адбываецца. Гэтыя падзеі падцвердзілі, што дэмакратыя з’яўляецца універсальнай мадэллю, якой жадаюць усе людзі і яна не чужая ні для адной з культур”, - сказаў Пан Гі Мун.

Генсек ААН звярнуў увагу на тое, што 2011 г. паказаў, што дэмакратыя не можа быць прынесена звонку: яна павінна нарадзіцца з волі народа і павінна падтрымліваццца актыўнай і моцнай грамадскай супольнасцю. Пан Гі Мун падкрэсліў, што ў гэтым годзе таксама адзначаецца 20-годдзе перамен, якія адбыліся ва Ўсходняй Еўропе. “Многія краіны гэтага рэгіёна, яшчэ сёння знаходзяцца толькі на пачатку свайго дэмакратычнага шляха. Я ведаю, якой працы патрабуе будаўніцтва прававой дзяржавы, умацаванне празрыстасці і адказнасці, перагляд палітычных і эканамічных сістэм”, - сказаў кіраўнік Арганізацыі Аб’яднаных Нацыі.

Ён адзначыў, што задача ААН палягае ў тым, каб спрыяць развіццю дэмакратычных працесаў ва ўсім свеце. “Праз сваю дзейнасць ААН не спрабуе экспартаваць ці спрыяць нейкай асаблівай нацыянальнай ці рэгіянальнай мадэлі дэмакратыі. Яе праца заключаецца ў тым, каб спрыяць разуменню таго, што дэмакратычныя ідэалы маюць свае карані ў філасофіях і традыцыях, што паходзяць з розных куткоў света, дэмакратычны урад эфектыўней гарантуе якасць жыцця мужчын і жанчын і дэмакратыя з’яўляецца фундаментам міра, бяспекі і працяглага развіцця”, - напісаў Пан Гі Мун.