Takim në Vatikan me përfaqësuesit e Vëllazërisë meshtarake Shën Piu X.
Sot më 14 shtator 2011 në selinë e Kongregatës së Vatikanit për Doktrinën e Fesë janë
takuar kardinali William Levada, Prefekt i të njëjtës Kongregatë e Presidenti i Komisionit
Papnor Ecclesia Dei, imzot Luis Ladaria, S.J., Sekretari i së njëjtës Kongregatë,
imzot Guido Pozzo, Sekretari i Komisionit Papnor Ecclesia Dei, me përfaqësuesit e
Vëllazërisë meshtarake Shën Piu X, Eprorin e përgjithshëm imzot Bernard Fellay, priftërinjtë
don Niklaus Pfluger e Alain-Marc Nély, asistentë të Eprorit të përgjithshëm të Lefebvrianëve
. Bashkëbisedimet e sotme janë një pikarritje e negociatave të gjata ndërmjet dy
palëve që janë hapur me tërheqjen e shkishërimit të katër ipeshkvijve lefebvrianë
nga ana e Papës. Argumenti i bashkëbisedimeve, ishte pajtimi i mundshëm i Vëllazërisë
së themeluar nga ipeshkvi imzot Marcel Lefebvre me Kishën Katolike të Romës. Sot paradite,
Kongregata e Vatikanit për doktrinën e fesë i ka propozuar imzot Bernard Fellayt,
Eprorit të lefebvrianëve, si një hyrje doktrinore që duhet të pranohet nga grupi i
ultratradicionalistëve, si dhe një zgjidhje të mundshme kanonike në rastin arritjes
së “pajtimit të mundshëm”. Ky aspekt i dytë, saktësoi Salla e Shtypit e Selisë së
Shenjtë, mund të konkretizohet në një Prelaturë personale ndërkombëtare, sipas modelit
të asaj të Opus Dei. Bëhet fjalë për një organizëm që nuk i përgjigjet ipeshkvijve
të veçantë e konferencave ipeshkvnore por drejtpërdrejtë Papës. Salla e Shtypit
e Vatikanit saktëson disa aspekte të negociatave që janë zhvillim e sipër në fusha
të ndryshme teologjike doktrinore e kanonike dhe përfundimet e arritura deri më sot.
Që nga viti 2008, shpjegon Salla e Shtypit vatikanase, “një komision i përzier studimi,
përbërë nga ekspertë të Vëllazërisë Meshtarake Shën Piu X e nga ekspertë të Kongregatës
për Doktrinën e Fesë, është mbledhur në tetë takime, që janë zhvilluar në Romës ndërmjet
muajit tetorit 2009 e muajit prill 2011”. “Këto bisedime – vijon deklarata – që
patën si synim paraqitjen dhe thellimin e vështirësive doktrinore thelbësore mbi tema
kontroverse, kanë arritur qëllimin e sqarimit të qëndrimeve dhe motiveve përkatëse”.
“Edhe në referim të shqetësimeve e të kërkesave të paraqitura nga Vëllazëria Meshtarake
Shën Piu X – pohon Salla e Shtypit e Selisë së Shenjtë – në fushën e rendit të ruajtjes
së integritetit të fesë katolike para hermeneutikës së ndërprerë të Koncilit të II
të Vatikanit nga Tradita, për çka foli Papa Benedikti XVI në Fjalimin e tij drejtuar
Kuries Romake (22-XII-2005), Kongregata për Doktrinën e Fesë e konsideron si bazë
themelore për arritjen e pajtimit të plotë me Selinë Apostolike pranimin e tekstit
të Hyrjes Doktrinore që është dorëzuar gjatë takimit të 14 shtatorit 2011. Hyrja
përmend disa parime doktrinore e kritere të interpretimit të doktrinës katolike, të
nevojshme për garantimin e besnikërisë ndaj Magjisterit të Kishës e “të qenit së bashku
me Kishën”, duke i lënë, në të njëjtë kohë, diskutimeve të ligjshme studimin dhe shpjegimin
teologjik shprehjeve të veçanta apo formulimeve të pranishme në dokumente të Koncilit
të II të Vatikanit e të Magjisterit të mëvonshëm”. “Në të njëjtën mbledhje – pohohet
akoma – janë propozuar disa elemente të një zgjidhjeje kanonike kishtare për Vëllazërinë
meshtarake shën Piu X pas pajtimin të mundshëm që urohet e shpresohet të arrihet”.