Ipeshkvijtë e Indisë për vizitën “ad Limina” në Vatikan. Kisha indiane për të rinjtë
e të varfrit
Vazhdon në Vatikan, vizita “ad Limina Apostolorum” e ipeshkvijve indianë, gjatë së
cilës ata takohen me Papën dhe me krerët e dikastereve të ndryshme të Selisë së Shenjtë
për të njoftuar dhe për të diskutuar me ta çështjet, problemet dhe për të parashtruar
gjendjen e Kishës Katolike në Indi. Në vend, të krishterët janë shpesh në shënjestër
të fondamentalistëve hinduistë, por gjendja po përmirësohet e ka shumë shpresa për
të ardhmen, siç nënvizon në mikrofonin tonë, kryeipeshkvi i Bopalit, imzot Leo Kornelio: Në
Indi, vend që mund ta quajmë nënkontinent, ka shumë kontraste. Ka shumë kultura, gjuhë
e fe e dalëngadalë, po rritet pabarazia ndërmjet të pasurve e të varfërve. Pikërisht
për shkak të këtij ndryshimi kemi konflikte, që shfaqen edhe në fushën e fesë. Kemi
një grup radikal hinduist, që krijon vështirësi. Këta fondamentalistë nuk duan të
ekzistojë mundësia e kthimit nga një fe në tjetrën. Mendojnë se fe si krishterimi,
islamizmi e judaizmi janë “të huaja”. Mund të them me siguri se çështja nuk qëndron
tek feja: shkaku kryesor i problemeve është politik. Ekstremistët janë politikanë,
ai lloj politikanësh që manipulojnë njerëzit për të krijuar vështirësi. Por India
në tërësi është një vend i lirë, një demokraci e madhe me shumë gjëra pozitive. Cili
mund të jetë kontributi i Indisë në botë? Gjëja më e rëndësishme është se India
respekton lirinë e të gjithë njerëzve. Kemi lirinë e shprehjes: ne mund të themi gjithmonë
atë që duam. Kemi lirinë e ndërgjegjes. Ekziston edhe shumë korrupsion e egoizëm,
por njerëzit janë të lirë ta kritikojnë këtë e t’i thonë qeverisë se kështu nuk shkon.
Me këtë demokraci, në Indi, mund të shprehemi lirisht, gjë që nuk është e mundur në
vende të tjera, si në ato pranë nesh. Mund të jetojmë së bashku, pavarësisht nga kontrastet.
Në një studim të kohëve të fundit vërehet se 95% e të rinjve deklarojnë se janë të
kënaqur me jetën e tyre. Nuk janë të pasur, nuk kanë shumë para, por kanë shpresë
në të ardhmen e kjo mendoj se është shumë e rëndësishme për të gjithë botën. Ne jemi
të pasur me shpresë e rinia është e pasur me entuziazëm. E Kisha tregon vëmendje
të veçantë për të rinjtë, apo jo? Kisha bën vërtet shumë për të rinjtë, pasi
mendojmë se e ardhmja e Kishës varet nga formimi i të rinjve. Ata mund të ndërtojnë
një Kishë më pozitive e duhet t’i formojmë, të ndërgjegjshëm për këtë.
Kujtojmë
se vizita “ad limina apostolorum” është vizitë që periodikisht, zakonisht çdo
5 vjet, ipeshkvijtë duhet të bëjnë në Romë për të informuar Selinë Apostolike mbi
gjendjen e dioqezave të veta.