Kryedioqeza e Ankona-Ozimos lindi në vitin 1986 nga bashkimi i dioqezave të të dy
qyteteve markixhane. Lajmet e para mbi krishterimin në zonë kanë të bëjnë me shën
Shtjefnin, për të cilin flet shën Agostini në njërin prej librave të tij. Tradita
kujton edhe shën Gregorin e Madh, sepse katedralja e parë e Ankonës i kushtohej atij.
Sipas një tradite edhe më të lashtë, trupi i shën Qiriakos u zhvendos nga Jeruzalemi,
ku qe martirizuar, për t’u varrosur në katedralen e shën Shtjefnit në shekullin IV
e më pas, në katedralen aktuale, në shekullin X. Gërmimet arkeologjike, që janë kryer
në katedralen e shën Qiriakos në vitin 1979, i japin të drejtë traditës. Sipas
gojëdhënave, territori i dioqezës së Ozimos u bë i krishterë në shekullin III, për
vepër të shën Feliçianit. Në vitin 303, gjatë persekutimeve të perandorit Dioklecian,
në Ozimo u martirizuan shenjtorët Florenci, Sisini e Diokleci. Në vendin e martirizimit
u ngrit një kishë, që mban emrin e tyre e ekziston edhe sot e kësaj dite.