Յարութ Սասունեան Այցելեց Հայ Կաթողիկէ Պատրիարքարան
Երէկ` ուրբաթ, 9 սեպտեմբեր 2011-ին, կէսօրէ առաջ ժամը 11:00-ին, Տանն Կիլիկիոյ կաթողիկէ
հայոց Ներսէս Պետրոս ԺԹ. պատրիարք ընդունեց ամերիկահայ հրապարակագիր Յարութ Սասունեանը
Հայ կաթողիկէ պատրիարքարանին մէջ: Հոգեւոր տէրը նախ շնորհաւորեց Յարութ Սասունեանը
նոր արաբերէն գիրքի շնորհահանդէսին առիթով: Ապա զինք տեղեկացուց Ամերիկայի նոր առաջնորդ
հայր Միքայէլ եպս. Մուրատեանի գահակալութեան մասին` յառաջիկայ 2 հոկտեմբեր 2011-ին: Հոգեւոր
տէրը յատուկ կերպով անդրադարձաւ «Ճինիշեան» հաստատութեան նկատմամբ Ամերիկայի նախագահ
Պարաք Օպամայի կողմէ տրուած վերջին որոշումներուն` Սուրիոյ կապակցութեամբ: Ան նաեւ յայտնեց
իր մտահոգութիւնը լիբանանահայութեան ապագային եւ Լիբանանի հայ դպրոցներու տնտեսական իրավիճակին
մասին: Հանդիպման ընթացքին քննարկուեցան հայութիւնը յուզող հարցեր: Յարութ Սասունեան
ներկայացուց իր գործունէութիւնները, ինչպէս նաեւ Միացեալ Նահանգներու եւ Հայաստանի միջեւ
փոխյարաբերութիւնները եւ Միջին Արեւելքի առնչութեամբ հարցեր: Հանդիպման աւարտին Սասունեան
հոգեւոր տիրոջ նուիրեց իր նոր հատորը` «Հայաստան – Թուրքիա արձանագրութիւնները` ճշմարտութի՞ւն,
թէ՞ խաբէութիւն», զոր դոկտ. Նորա Արիսեան թարգմանած է արաբերէնի: