Кардынал Равазі: неабходна аднавіць сувязь паміж музыкай і верай
“Аднавіць сувязь паміж
сучаснай музыкай і літургіяй, каб даць новае дыханне адносінам, дзякуючы якім у мінулым
былі створаны бессмяротныя шэдэўры”, - сказаў падчас адкрыцця кангрэса пад назвай
“Музыка і вера” старшыня Папскай рады па культуры кардынал Джанфранка Равазі. Форум,
у якім прымаюць удзел шматлікія сучасныя кампазітары з усяго свету, адкрыўся 10 верасня
ў італьянскай Перуджы.
У інтэрв’ю нашаму радыё іерарх адзначыў, што дзякуючы
адносінам паміж верай і музыкай з’явіліся сапраўдныя шэдэўры.
“На працягу
амаль двух тысячагоддзяў, музыка і вера заўсёды ўзаемадзейнічалі паміж сабой: можна
ўзгадаць шматлікія псальмы, св. Імшы, грыгарыянскія спевы, гімны і іншыя творы. Гэтыя
адносіны, аднак, сёння ў пэўнай ступені спыніліся, бо вельмі часта сучасныя музычныя
творы не адпавядаюць той вышыні, якую яны павінны перадаваць. З іншага боку, існуе
музыка, якая з’яўляецца вельмі далёкай ад якога-небудзь дыялога з верай. Важна аднавіць
глыбокую сувязь, якая аб’ядноўвае і звязвае паміж сабой гэтыя дзве “сястры”.
Гаворачы
аб сучаснай духоўнай музыцы кардынал Равазі вылучыў тры яе узроўні: першы, гэта ўся
сучасная музыка , ў якой прысутнічаюць духоўныя матывы. Гэта могуць быць творы Дэ
Андрэ, амерыканца Леанарда Коўэна, а таксама сучасных італьянскіх выканаўцаў Вэкіоні,
Бальоні. Другі узровень, на думку кардынала, прадстаўлены творамі сакральнай музыкі,
якая можа быць і канцэртнай. Гэта музыка ў якой выкарыстоўваюца біблійныя тэксты і
тэмы. Нарэшце трэці узровень, самы складаны – гэта літургічная музыка. “Творы такога
узроўня, павінны перадваць значэнне абрадаў, быць іх выразам”, - сказаў кардынал Равазі.