Kardinal Ravazi në Festivalin Muzikor në Umbria: muzika të frymëzohet sërish nga feja
për të krijuar kryevepra si në të kaluarën
Fillon nesër në Perugjia të Italisë Festivali i 66-të Muzikor i Umbrias, një nga më
të lashtët e muzikës kishtare e klasike, që këtë vit ka si temë “Nga bota e vjetër
në të renë”. Përurimi i festivalit i takon Kuvendit “Muzika dhe feja”, ku do të marrin
pjesë disa nga kompozitorët dhe instrumentistët më të njohur italianë e ndërkombëtarë.
Qëllimi është të reflektohet mbi marrëdhëniet ndërmjet muzikës bashkohore dhe formave
të liturgjisë, për t’i dhënë frymë të re atij raporti, që në të kaluarën ka nxjerrë
në dritë kryevepra të pavdekshme. Pjesëmarrësit do të përshkojnë një rrugë, që çon
nga misionet e jezuitëve në Amerikën e Jugut, në vitet ‘600, në të cilat u përdor
jashtëzakonisht muzika e deri në Nju Jorkun e viteve ‘900, me Leonard Bernshtajnin,
autorin e “West Side Story”. Për marrëdhëniet, që lidhin muzikën me fenë, i drejtuam
mikrofonin kryetarit të Këshillit Papnor të Kulturës, kardinalit Gjanfranko Ravazi,
i cili nesër do të hapë punimet e Kuvendit në Perugjia: Marrëdhëniet ndërmjet
muzikës dhe fesë kanë pas vetes një traditë të jashtëzakonshme, që ka prodhuar një
numër shumë të madh kryeveprash. Për dy mijëvjeçarë, muzika e feja janë ndërthurur
gjithnjë mes tyre: mendoni për shembull, për Psalterin, për Meshët, për këngët gregoriane,
për himnet e kështu me radhë… Por, këto marrëdhënie janë prishur disi, pasi nganjëherë,
kompozimet kishtare të sotme nuk janë në nivelin e duhur. Nga ana tjetër, muzika tashmë
është drejtuar në shtigje krejtësisht larg çdo dialogu me fenë. Është e rëndësishme
ta ringjallim këtë lidhje të thellë, që i bashkon këto dy “motra”. Sipas jush,
cili është niveli i sotëm i muzikës liturgjike? Mendoj se duhen marrë parasysh
tri nivele të ndryshme. Niveli i parë është pa dyshim ai i muzikës shpirtërore të
mirëfilltë: kështu është krejt muzika me rëndësi, por edhe muzika e të rinjve të sotëm
përmban në vetvete tensione të tipit shpirtëror. Të mendojmë, për shembull, për disa
autorë si italiani De André; apo Leonard Kohen në SHBA-të, që shpesh frymëzohet nga
trashëgimia biblike; ose edhe italianë të tjerë si Vekioni, Baljoni apo Batiato. Janë
autorë, që megjithëse i përkasin një horizonti – të themi – jashtë Kishës, kanë një
muzikë shpirtërore të tyren. Ekziston pastaj një nivel tjetër, që është ai i muzikës
kishtare, asaj më solemnes, që mund të përdoret edhe nëpër koncerte, siç ndodhte në
të kaluarën e siç ndodh edhe sot. Kjo muzikë e ka bazën mbi tekstet ose temat biblike
e me gjuhën e re muzikore, mund të krijojë vepra të reja. Niveli i tretë, më delikati
e më i ndërlikuari, është ai liturgjik. Nga njëra anë, duhet ta shfrytëzojmë gjithnjë
mundësinë për të dëgjuar muzikë nga trashëgimia e pasur e së kaluarës, por, nga ana
tjetër, duhet të arrijmë të krijojmë forma të reja, që të mos jenë me cilësi të ulët.
Kemi nevojë për kompozime, të cilat e kanë parasysh ritin, kultin dhe formën e tij
të shprehjes, por që sjellin edhe risi, duke përdorur gramatikën e re të muzikës bashkohore.