ՀՕՄը Կը Միանայ Ափրիկէի Սովահարներու Օգնութեան Ճիգերուն
ՊՈՍԹԸՆ.- Հայ Օգնութեան Միութիւնը միացած է Dorcas Aid կազմակերպութեան, օժանդակութեան
ձեռք մեկնելու համար Ափրիկէի Ծոցի շրջանը հարուածած սովի զոհերուն: Անցնող յիսնամեակի
ծանրագոյն երաշտը կը հարուածէ Ափրիկէի Արեւելեան շրջանները: Այս աղէտին հետեւանքով սովը
կը սպառնայ աւելի քան տասը միլիոն մարդու կեանքին: Պարագան ծանր է յատկապէս Սոմալիոյ
մէջ, ուրկէ օրական միջին հաշուով 1600էն 2000 հոգի կը հասնի Եթովպիոյ մէջ հաստատուած
գաղթակայանները՝ օրեր, երբեմն շաբաթներ քալելէ ետք: Վատառողջ, սովահար ու ծարաւ վիճակի
մէջ գաղթակայաններ ապաստանածներուն թիւը անցած է արդէն 125 հազարի սահմանը: ՀՕՄի
Կեդրոնական վարչութեան ատենապետուհի Վիգի Մարաշլեան ըսած է թէ «Մեր նախաձեռնութեան բնաբանն
է «ՕԳՆԵՑԷՔ մեզի ՕԺԱՆԴԱԿԵԼՈՒ համար սովահարներուն» արդ՝ կոչ կ՝ուղղենք բոլորին ՀՕՄի
աշխարհասփիւռ միաւորներուն ճամբով նուիրատուութիւններ կատարելու, առաւելագոյն թիւով մարդոց
ցաւը թեթեւցնելու համար»։ DorAid America կազմակերպութեան գործադիր տնօրէնը, Տիգրան Եումուշաքեան,
«Բարձր գնահատած է Հայ Օգնութեան Միութեան վսեմ այս քալը եւ ապագայ գործակցութեան ոգիով
կը նայի անոր ՝՝։ Dorcas Aid-ը քսան երկիրներու մէջ բարեսիրական եւ զարգացման ծրագիրներ
իրականացնող քրիստոնէական միջազգային կազմակերպութիւն մըն է։ Այդ երկիրներու շարքին է
Հայաստանը։ DorAid America-ն անոր գործակից կառոյցն է, որ կը գործէ ԱՄՆի Նիւ Ճըրզի նահանգէն:
Իսկ Հայ Օգնութեան Միութիւնը որ (2010ին իր 100ամեակը նշեց) հայկական կանանց մարդասիրական
հնագոյն կազմակերպութիւնն է, ունի միաւորներ 27 երկիրներու մէջ: