Հայաստանի Սփիւռքի Նախարարին Առընթեր Ատեանի 7-րդ Նիստի Կայացում։
Հայաստանի սփիւռքի նախարարին առընթեր ատեանի 7-րդ նիստը, տեղի ունեցաւ 26 օգոստոսին։
Նիստի օրակարգին վրայ ընդգրկուած էին հինգ հարցեր. այս առթիւ քննարկուեցան Հայաստանի
սփիւռքի նախարարութեան 2012-ի «Մեր մեծերը» ծրագիրին վերաբերող հարցը: Առաջարկուած 11
թեկնածուներէն 2012-ի «Մեր մեծերը» ծրագիրին մէջ հաստատուեցան` Յովսէփ Օրբելին (125-ամեակ),
Սայեաթ Նովան (300-ամեակ), Գառզուն` Գառնիկ Զուլամեան (105-ամեակ) եւ Յովհաննէս Բաղրամեանը
(115-ամեակ): Հայաստանի մէջ բնակող իրաքահայերու համարկման ուղղուած աշխատանքներուն
ընթացքին մասին զեկուցեց Հայաստանի սփիւռքի նախարարութեան աշխատակազմի Մերձաւոր եւ Միջին
Արեւելքի հայ համայնքներու վարչութեան պետ Ա. Դումանեան: Վերջինս ներկայացուց հայրենիքի
մէջ բնակող իրաքահայերու խնդիրները, այս ուղղութիւններով Հայաստանի սփիւռքի նախարարութեան
կողմէ կատարուած ուսումնասիրութիւնները եւ կատարուած աշխատանքները: Օրակարգի երրորդ
հարցը կ՛առնչուէր Հայաստանի սփիւռքի նախարարութեան Եւրոպայի հայ համայնքներու վարչութեան
հաշուետուութեան: Զեկուցող Հ. Ասլանեան ներկայացուց այն բոլոր ծրագիրները, զորս կ՛իրականացնէ
Եւրոպայի հայ համայնքներու վարչութիւնը: Օրակարգի չորրորդ հարցը` Հայաստանի սփիւռքի
նախարարութեան աշխատակազմի տեղեկատուութեան եւ հեռահաղորդակցութեան վարչութեան հաշուետուութիւնը,
ներկայացուց տեղեկատուական-վերլուծական բաժանմունքի պետ Ն. Նալբանդեան: Ընթացիկ հարցերու
ծիրին մէջ նախարարութեան աշխատակազմի Հայրենադարձութեան եւ հետազօտութիւններու վարչութեան
պետ Ա. Եղիազարեան ատեանի անդամներուն ներկայացուց 19-20 սեպտեմբերին տեղի ունենալիք
Սփիւռքի կազմակերպութիւններու ներկայացուցիչներու եւ համայնքներու ղեկավարներու համահայկական
համաժողովի ծրագիրը: Ներկայացուած բոլոր հարցերուն շուրջ տեղի ունեցան քննարկումներ
եւ տրուեցան յանձնարարականներ։