Martirizimi i Shën Gjon Pagëzuesit. Papa: të krishterët ta shpallin të vërtetën pa
asnjë kompromis!
Kisha përkujton sot martirizimin e Shën Gjon Pagëzusit: “Më të madhit ndër profetët
e Krishtit – pohon Papa në magjisterin e tij – që diti ta mohojë vetveten, për t’i
përgatitur rrugën Shëlbuesit, njeriut, që vuajti shumë, sepse tha gjithnjë vetëm të
vërtetën. E për të vërtetën edhe vdiq!”. Papa e paraqet figurën e dëshmitarit të
parë të Jezusit si shembull, që meriton të ndiqet nga gjithë të krishterët, sepse
feja kërkon nga ne ta kumtojmë qartë të vërtetën e dashurisë ungjillore, pa frikë
e pa ngurrime, pa iu nënshtruar asnjëherë kushtëzimeve të botës, si Shën Gjoni, jeta
e të cilit, ashtu si ajo e Virgjërës Mari, iu kushtua krejtësisht Krishtit. Gjon Pagëzuesi
qe pararendësi, ‘zëri’ i dërguar për të kumtuar Krishtin, Fjalën e mishëruar. Prandaj,
ta kremtosh dy herë, në ditëlindjen e tij për tokë e në atë për qiell, do të thotë
të kremtosh Krishtin, përmbushjen e premtimeve të të gjithë profetëve, nga të cilët
Gjon Pagëzuesi qe më i madhi, sepse i thirrur të përgatisë udhën para Mesisë. Benedikti
XVI na kujton edhe se të gjithë ungjijtë e fillojnë rrëfimin mbi jetën publike të
Jezusit, duke përshkruar sesi Gjoni e pagëzoi Zotin në lumin Jordan. E edhe libri
“Jezusi i Nazaretit” nis me këtë ngjarje, që asokohe pati jehonë të jashtëzakonshme.
Njerëzit rendnin nga Jeruzalemi e nga të katër anët e Judesë për të dëgjuar Shën
Gjon Pagëzuesin e për t’u pagëzuar prej tij në lumë, duke rrëfyer mëkatet e tyre.
Gjoni është i famshëm, megjithëse nuk kumton vetveten, por “Qengjin e Hyjit, që shlyen
mëkatin e botës”. Ai është dëshmitari i parë i Jezusit që, duke pasë marrë shenja
nga qielli, e tregon atë si Birin e Hyjit e shpërblyesin e njeriut. Rrëfen, kështu,
të vërtetën, pa kurrfarë frike: “Si profet i vërtetë, Gjoni bëri dëshmi për
të vërtetën, pa kompromise. Denoncoi shkeljet e urdhërave të Hyjit, edhe kur ata që
nuk i respektonin, ishin njerëz të pushtetshëm. Kështu, kur akuzoi Herodin e Herodiadën
për shkelje kurore, e pagoi me jetë, duke e vulosur me martirizim shërbimin e tij
ndaj Krishtit, që është vetë e Vërteta. T’i lutemi të ndërmjetësojë për ne, së bashku
me Zojën e Bekuar, që edhe në ditët tona Kisha t’i qëndrojë gjithnjë besnike Krishtit
e ta dëshmojë me guxim të vërtetën e tij e dashurinë e tij për të gjithë”(Lutja
e Engjëllit të Tënzot, 24 qershor 2007). Të krishterët nuk e
kërkojnë martirizmin – shpjegon Papa – por janë gati të japin edhe jetën, për t’i
qëndruar gjithnjë besnikë Ungjillit. Cila është, atëherë, karakteristika dalluese
e martirit të krishterë? “Duhet vënë gjithnjë në dukje kjo karakteristikë dalluese
e martirizimit të krishterë: është gjithnjë vetëm akt dashurie për Hyjin e për njerëzit,
duke përfshirë edhe persekutorët. Prandaj ne...i lutemi Zotit të na mësojë t’i duam
edhe armiqtë tanë”(Lutja e Engjëllit të Tënzot, 26 dhjetor 2007). Martiri
ecën deri në fund të fundit në gjurmët e Zotit, duke pranuar vullnetarisht të vdesë
për shëlbimin e botës e duke dhënë, kështu provën më të lartë të dashurisë. Prej nga,
atëherë, buron forca për të përballuar martirizimin? “Nga shkrirja e thellë
dhe e plotë me Krishtin, sepse martirizimi e thirrja për t’u martirizuar, nuk janë
rezultat i përpjekjeve njerëzore, por përgjigje që i jepet nismës dhe thirrjes së
Zotit; janë, prandaj, dhuratë e hirit të Tij, që e bëjnë njeriun të aftë të japë jetën
e vet nga dashuria për Krishtin, për Kishën e tij e për botën”( Audienca e
përgjithshme, 11 gusht 2010). Sa bij e bija të Kishës, në rrjedhë shekujsh
– vijon të kujtojë Papa – e ndoqën hap pas hapi këtë shembull. Është një dëshmi që
nis gjatë persekutimit të parë në Jeruzalem e vijon me radhët e gjata të martirëve,
deri në ditët tona: “Shpesh herë edhe sot nga vise të ndryshme të botës vijnë
lajme që flasin për misionarë, meshtarë, ipeshkvij, rregulltarë, rregulltare e besimtarë
laikë të persekutuar, të burgosur, të torturuar, të privuar nga liria ose të penguar
në ushtrimin e saj, vetëm e vetëm pse janë nxënës të Krishtit e apostuj të Ungjillit;
nganjëherë njerëzit vuajnë e vdesin edhe për shkak të bashkimit me Kishën universale
e të besnikërisë ndaj Papës”(Lutja e Engjëllit të Tënzot, 26 dhjetor 2007). T’i
falësh salvuesit, t’i duash armiqtë, ky është revolucioni i vërtetë i krishterë:
“Martiri i krishterë aktualizon fitoren e dashurisë mbi urrejtjen e mbi vdekjen.
Të lutemi për ata që vuajnë nga shkaku i besnikërisë ndaj Krishtit e Kishës së Tij.
Zoja e Bekuar, Mbretëreshë e Martirëve, na ndihmoftë të jemi dëshmitarë të besueshëm
të Ungjillit, duke iu përgjigjur armiqve me forcën çarmatosëse të së vërtetës e të
dashurisë”(Lutja e Engjëllit të Tënzot, 26 dhjetor 2007).