Janë qindra familje nga Kosova që presin të zbardhet fati i familjarëve të tyre, të
cilët u zhdukën gjatë luftës së fundit në Kosovë. Edhe 1811 persona ende figurojnë
në listën e të pagjeturve, ndërkohë që familjarët shprehen të pakënaqur me angazhimin
e institucioneve vendore e ndërkombëtare rreth kësaj çështje, para së gjithash humane.
Në mesin e të pagjeturve është 0065, i biri i Bajram Qerkinit, Reshati. Bajram
Qerkini shprehet i pakënaqur me angazhimin e institucione rreth kësaj çështje. “Është
e rende kjo pritje. Vetëm ai që ka fëmijë dhe nuk e din se ku e ka fëmijën e beson.
Është e rëndë për secilin, jo vetëm unë që e kam djalin po edhe ajo nënë që ia kanë
marrë fëmijën nga prehri dhe për të gjithë familjarët të cilët kanë humbur më të dashurit
e tyre, është e rëndë deri sa të zbardhet fati i tyre”, shprehet Qerkini. Ndryshe,
sipas të dhënave të Komitetit të Kryqit të Kuq Ndërkombëtar, aktualisht në Kosovë
figurojnë si të zhdukur 1811 persona, shumica prej tyre shqiptarë, por edhe të nacionalitetit
serb, rom dhe të komuniteteve tjera. Zbardhja e fatit të këtyre personave, tash e
12 vjet vazhdon të jetë brengë e familjarëve të këtyre personave, por edhe e autoriteteve
kosovare. Zëvendëskryeministrja e Kosovës Edita Tahiri thotë se çështja e të pagjeturave
që nga viti 1999 vazhdon të jetë një çështje shumë e rëndë dhe shqetësuese. Ajo thekson
se në kuadër të dialogut me Serbinë kanë kërkuar që të gjitha varrezat masive të cilat
ende nuk janë zbuluar apo hulumtuar të bëhen, dhe po ashtu siç thekson Tahiri, është
kërkuar nga Beogradi t’i sjellin të gjitha të dhënat në mënyrë që kjo çështje të shkojë
drejt zgjidhjes. Edhe Prenk Gjetaj, drejtues i Komisionit Qeveritar për Personat
e Pagjetur, thotë se janë duke u angazhuar për zbardhjen e fatit të të pagjeturve.
“Dita ndërkombëtare e të pagjeturve shënohet në çdo vend të botës dhe edhe ne si pjesë
e botës patëm fatin e keq që të humbim shumë njerëz në luftë dhe të mos dimë për fatin
e tyre. Edhe ne jemi këtu që të angazhohemi për ndriçimin e fatit të të pagjeturve”,
thotë ai. Për të shënuar Ditën Ndërkombëtare të të Pagjeturve, Këshilli Koordinues
të Asociacioneve të Familjarëve të të Zhdukurve, organizoi një aksion simbolik në
Prishtinë, për të sensibilizuar opinionin në lidhje me këtë problem, që po zvarritet
tash 12 vjet. Kryetari i këtij Këshilli, Haki Kosumi, tha se janë të vendosur dhe
nuk do të ndalen deri në zbardhjen e fatit të qytetarit të fundit të evidentuar në
listën e të pagjeturve. “Ne i bëjmë thirrje qeverisë tonë dhe faktorit ndërkombëtarë
dhe i tregojmë botës se edhe ne jemi pjesë e saj dhe sot shënojnë ditën e dhimbjes
globale ditën e dhimbjes ndërkombëtare, e cila për fat të keq e ka goditur edhe Kosovën”,
thekson ai. /nga Telegrafi/