“Гарадскія ўлады Адэсы,
на Украіне, не далі дазвол на правядзенне Эўхарыстычнай працэсіі, якая павінна была
адбыцца з нагоды Сусветных дзён моладзі”, - расказаў у інтэрв’ю нашаму радыё біскуп
Адэска-Сімферопальскай дыяцэзіі Браніслаў Бернацкі.
“Звычайна мы праводзілі
дыяцэзіяльны моладзевы форум. Частка маладых людзей паехала ў Мадрыд на сустрэчу са
Святым Айцом, а іншыя засталіся на Украіне. У Адэсе мы планавалі арганізаваць Эўхарыстычную
працэсію з моладзю ад касцёла св. Пятра да катэдры”, - расказаў іерарх.
Біскуп
Бернацкі адзначыў, што ў мінулыя гады з арганізацыяй працэсіі ў рамках моладзевага
форума ніколі не ўзнікала праблем, але ў гэтым годзе ўлады ў апошні момант не далі
дазвол на яе правядзенне. Іерарх адзначыў, што у Адэсе дзейнічаюць агрэсіўна настроеныя
актывісты арганізацыі “Зубр” ("За саюз Украіны, Беларусі і Расіі"), і ў адміністрацыі
горада прычыну адказа патлумачылі тым, што яе члены планавалі ўчыніць напад на каталіцкую
працэсію.
“У касцёле св. Пятра адбылася адарацыя, а затым прыватна, без Найсвяцейшага
Сакрамэнта, маладыя людзі, разам са святарамі і законнымі сёстрамі прайшлі да катэдры
і ніхто на нас не нападаў”, - расказаў біскуп Адэска-Сімферопальскай дыяцэзіі. Іерарх
адзначыў таксама, што ў гэтым годзе вернікам Адэсы мясцовыя ўлады не дазволілі правядзенне
працэсіі Божага Цела.