Papa në audiencën e përgjithshme flet për DBR-së të Madridit: ngjarje e paharrueshme!
“Një ngjarje e madhe kishtare, tepër emocionuese”. Me këto fjalë e hapi Benedikti
XVI tregimin për Ditën Botërore të Rinisë të Madridit, në praninë e besimtarëve, që
morën pjesë, sot paradite, në audiencën e përgjithshme, mbajtur në Pallatin Apostolik
të Kastel Gandolfos. Reflektimi i shkurtër i Papës u mbyll me njoftimin e temës së
Ditës së ardhshme Botërore të Rinisë, që do të mbahet në Rio-de-Zhanéjro.
Ishte
një përvojë tepër emocionuese, që nuk mund të përshkruhet me pak fjalë. Këtë theksoi
sot Papa, kur nisi katekizmin, kushtuar DBR-së së paharrueshme të Madridit. Gjithsesi
Benedikti XVI nuk i kurseu epitetet, në përpjekjen për t’i përcjellë turmës së vogël
të Kastel Gandolfos, gjurmët e thella, të jashtëzakonshme, të paharrueshme, që i lanë
në shpirt, ditët e Madridit: “Ishte, e ju e dini, një ngjarje kishtare emocionuese;
rreth dy milion të rinj, nga të gjithë Kontinentet, jetuan, plot gëzim, përvojën e
shkëlqyer të vëllazërisë, të takimit me Zotin, të emocioneve të përbashkëta e të rritjes
në fe: një ujëvarë e vërtetë drite. E falënderoj Zotin për këtë dhuratë të çmuar,
që të mbush me shpresë për ardhmërinë e Kishës; për këta të rinj, me dëshirë të fortë
e të sinqertë që ta rrënjosin jetën e tyre në Krishtin, të mbeten të bazuar në fe,
të ecin së bashku me Kishën”. Më pas, Papa kaloi tek çastet e veçanta të
tubimit të madh, të cilat i kujtoi një nga një, duke nisur nga entuziazmi i papërmbajtur
i të rinjve, të etur për një të vërtetë më të thellë, mbledhur mbrëmjen e parë në
Sheshin e Cibeles, për të kaluar tek takimi me rregulltaret e reja e me pedagogët
e rinj universitarë, ndërmjet të cilëve kaloi disa çaste të paharrueshme në Manastirin
e El Eskorial-it: të parat e prekën thellë Papën, me fenë e tyre plot guxim, drejtuar
nga ardhmëria; të dytët, me gatishmërinë për të qenë mësues jo vetëm në auditore,
por sidomos, në jetë. Benedikti XVI kujtoi edhe të rinjtë, të cilët në Madrid ndjenë
si u rrihte fort zemra, duke dëgjuar thirrjen e re, të heshtur, por këmbëngulëse,
që u drejtonte vetë Zoti: “Ndërmjet të pranishmëve kishte më se një
të ri, që e pati ndjerë thirrjen e Zotit pikërisht në Ditët e mëparshme Botërore të
Rinisë; jam i sigurt se edhe në Madrid Zoti u ka trokitur shumë të rinjve në portën
e zemrës, duke i thirrur ta ndjekin pas me bujari në misionin meshtarak ose në jetën
rregulltare”. Ndërmjet kujtimeve, që Papa i tregoi shkurtimisht, nuk mungoi
edhe ai çerek ore i mbrëmjes të së shtunës - që u përshkrua në mënyra nga më të ndryshmet
në mjetet e komunikimit - por që Papa e shikon si shembull, i cili i tregoi qartë
ç’rini kishte përballë: “Në mbrëmje, një turmë të rinjsh në festë, pa u trembur
fare nga rrebeshi e nga era, vijoi të adhuronte në heshtje Krishtin e pranishëm në
Eukaristi, për ta lavdëruar, për ta falënderuar e për t’i kërkuar ndihmë e dritë”. Në
oborrin e Pallatit Apostolik të Kastel Gandolfos u valëvit mëse një flamur me stemën
e DBR-së drejt ballkonit, prej nga Papa e përmblodhi kështu “këtë dhuratë të madhe”,
që – siç theksoi - e solli me vete nga Spanja: “Takimi i Madridit
ishte një manifestim mahnitës feje, për Spanjën e për mbarë botën. Për shumicën e
të rinjve, ardhur nga të katër anët e tokës, ishte rast i posaçëm reflektimi, dialogimi,
shkëmbimi të përvojës pozitive e, sidomos, lutjeje të përbashkët, për të përsëritur
zotimin se do ta rrënjosin gjithë jetën në Krishtin, që është Miku më besnik i të
rinjve”. Papa nuk deshi ta përfundojë tregimin e tij, pa njoftuar edhe
temat e DBR-së së ardhshme: “Ajo e vitit të ardhshëm , që do të kremtohet
në dioqezat e ndryshme, do të ketë moton: “Gëzohuni përherë në Zotin”, shkëputur nga
Letra drejtuar Filipianëve; ndërsa në DBR-së të 2013-tës, në Rio-de Zhanéjro, motoja
do të jetë mandati i Jezusit: “Shkoni e bëjini dishepuj mbarë popujt”! Që tani ia
besoj lutjes të të gjithëve përgatitjen e këtyre takimeve tepër të rëndësishme. Faleminderit!”.
Gjatë përshëndetjeve përfundimtare, në dhjetë gjuhë të ndryshme, Benedikti
XVI kujtoi përsëri përvojën e madhe, që fitoi, në radhë të parë ai vetë, në takimin
e paharrueshëm të Madridit – siç theksoi në gjuhën angleze. Një përshëndetje tjetër,
posaçërisht e rëndësishme, ajo, që Ati i Shenjtë e shqiptoi në gjuhën ukrainase –
për të kujtuar 20-vjetorin e pavarësisë, që e festoi pikërisht sot ky vend, historia
dhe kultura e të cilit përshkohen në mënyrë të pashlyeshme, nga vlerat e krishtera. Ky
ishte edhe mendimi i fundit i kësaj audience. Në të u ndjenë fort gjurmët e paharrueshme,
të jashtëzakonshme, të Ditës Botërore të Rinisë, që sapo përfundoi. Gjatë kremtimit
të saj, mbarë rinia katolike botërore tregoi konkretisht se s’ka stuhi në botë, që
e ndan nga kundrimi i Krishtit, në të cilin dëshiron të mbetet e rrënjosur, për t’i
siguruar mbarë njerëzimit një ardhmëri vërtet të ndritur.