Madridi nuk ka shumë hapësira të gjelbëruara, prandaj parku “Buen Retiro”, që shtrihet
pas Muzeut të Prados konsiderohet mushkëria e gjelbërt e qytetit. Parku prej 118 hektarësh
është projektuar dhe realizuar ndërmjet viteve 1630 e 1640 për dëfrimet e oborrit
mbretëror. Parku u hap për qytetarët nga mbreti Karli III, monark mendjendritur, që
e udhëhoqi vendin nga viti 1759 deri në vitin 1788. Gjithsesi, mbreti specifikonte
se qytetarë, që mund të hynin në park, duhej të ishin “të pastër e të veshur mirë”.
Gjatë pushtimit të Napoleonit, në vitin 1808, kopshtet e parkut u përdorën si fortifikata.
Pas luftës së pavarësisë, filloi rindërtimi e, në vitin 1868, kopshtet bëhen pronë
komunale. Parku “Buen Retiro” është një nga vendet më të bukura për shëtitje të banorëve
të Madridit, të cilët shkojnë aty sidomos të dielave. Parku shndërrohet në një cirk
në qiell të hapur me muzikantë, pehlivanë, zhonglerë, në atmosferën tipike gazmore
të Madridit.