Pas Meshës, Papa u rikthye në sakresti e, në një nga mjediset në dalje të saj, pati
një takim të shkurtër me zotin Mariano Rajoy Brey. Është takimi i tretë i Benediktit
XVI me personalitetet më të larta të jetës politike në vend, pas takimit me Mbretin
Huan Karlos dhe kryeministrin Zapatero. I lindur në Santiago de Kompostela në
vitin 1995, zoti Brey u diplomua në jurisprudencë në Universitetin e qytetit të tij
të lindjes. Më 1981 u zgjodh në Asamblenë Rajonale të Galicisë; më 1986, në Parlament,
si deputet i Partisë Popullore. Zv.sekretar i Partisë, që nga viti 1990, u bë kryetar
i saj në vitin 2003. Ka qenë ministër në qeverinë e viteve 1996-2003. Tani është
kreu i opozitës. Në përfundim të këtij takimi të shkurtër, Benedikti XVI e kaloi drekën
në Selinë e Kryeipeshkvit të Madridit, kardinalit Ruoko Varela, ku së pari vizitoi
kapelëzën, në katin e parë të Pallatit të kryeipeshkvisë, për t’u tërhequr disa çaste
në apartamentin, vënë në dispozicion të tij, në pritje të arritjes së kardinajve të
Spanjës, të ipeshkvijve të provincës së Madridit dhe të grupit të tij shoqërues, për
të drekuar së bashku.