DBR: Atë Lombardi, në sofër me Papën nuk kishte asnjë të rekomanduar
Asnjë nga 12 të rinjtë, që u ulën në sofër me Papën sot, gjatë drekës së shtruar në
Sallonin e Ambasadorëve, nuk ishte i rekomanduar. U zgjodhën me short ndërmjet grupeve
të vullnetarëve, ashtu si u zgjodh Matia, në Veprat e Apostujve. E sqaron këtë atë
Federiko Lombardi, drejtor i Sallës vatikanase të Shtypit, duke treguar se ndërmjet
atyre, që u ra shorti të drekonin me Atin e Shenjtë, ishte edhe një djalosh francez,
dhëndërr i ri, i sapomartuar me një vullnetare të DBR-së. Me që nuses së re nuk i
ra shorti, nuk mundi të merrte pjesë në drekë. Gjithsesi, kur dreka po i afrohej fundit,
ajo, që priste të dilte i shoqi, për t’i treguar mbresat, ende të freskëta, u ftua
e iu paraqit Papës. “Takim prekës - sqaron atë Lombardi - gjatë të cilit Ati i Shenjtë
mundi t’i bëjë urimet më të mira, një çifti që lindi në klimën e ngrohtë të DBR-së”.Me
short u zgjodhën edhe tre të rinjtë, që do të rrëfehen nesër me Papën, sqaron atë
Lombardi. U mblodhën të gjithë ata, që dëshironin të gjunjëzoheshin në rrëfyestoren
e Benediktit XVI. Por, para se të hidhej shorti, u sqaruan se duhet të flisnin ndonjërën
nga gjuhët kryesore të Evropës: italishten, frëngjishten ose gjermanishten, gjuhë
që Papa i kupton mirëfilli, pa kujtuar këtu edhe anglishten e spanjishten.