Papa: të rinjtë të shqetësuar për punë dhe të ardhmen e tyre, meritojnë respektin
e të gjithëve
Papa Jozef Ratcinger posa mbërriti në Madrid i përshëndeti të gjithë banorët e Madridit
e të gjithëve u kërkoi respekt për të rinjtë e Ditës Botërore të Rinisë ( të cilët
dje pësuan fyerje të rënda gjatë manifestimit të “indignatos”). “Që tani përshëndes
përzemërsisht – tha Papa – të miqtë e dashur spanjollë e madrilenë e edhe ata që kanë
ardhur prej vendeve tjera. Gjatë këtyre ditëve do të bashkohem me ju, duke pasur mirë
parasysh të gjithë të rinjtë e botës, posaçërisht ata që kalojnë sprova të ndryshme”. Për
Papën teolog, DBRS-së do të shërbejë e jetë “ndihmë për dishepujt e ri të Jezusit
që të qëndrojnë të fortë në fe e të marrim mbi vete aventurën e mrekullueshme për
ta kumtuar e dëshmuar Krishtin haptazi me jetën personale” . E Benedikti XVI e
di se “shumë të rinj e shikojnë të ardhmen me shqetësim, për shkak se gjenden para
vështirësisë së gjetjes së një pune të denjë, apo sepse është humbur vendi i punës
apo për arsye se puna është me afat të caktuar dhe e paqëndrueshme”. Papa Benedikti
XVI nënvizon këtë aspekt në fjalimin e tij të parë shqiptuar në aeroportin Barajas
të Madridit, ku mbërriti për të kremtuar me të rinjtë e mbarë botës Ditët e 26-të
të Rinisë që zhvillohen në kryeqytetin spanjoll deri të dielën e ardhshme. “Të
rinj të tjerë – vijoi Ati i Shenjtë Ratcinger, duke folur në praninë e Mbretit të
Spanjës Juan Carlos e të kryeministrit Josè Zapatero – kanë nevojë të jenë të njoftuar
e këndej të qortohen që të mos bien në rrjetin e drogës; apo të kenë asistencën e
nevojshme, nëse, fatkeqësisht, kanë rënë në këtë rrjetë”.