Հայ Հինգ Լեռնագնացները Գազպեգի Գագաթին Ծածանած Են Հայոց Եռագոյնը։
Լեռնագնացութեան եւ լեռնային զբօսաշրջութեան հայկական դաշնակցութիւնը Սեպտեմբերին պիտի
ստեղծէ մարզական ակումբներ եւ պիտի սկսի աշխոյժ մարզումներ իրականացնելու պատանիներու
հետ: Կը նախատեսուի համալսարաններու մէջ ունենալ լեռնագնացութեամբ զբաղող միաւորումներ:
Կը նշուի, թէ շուրջ 120 երիտասարդ դիմած է լեռնագնացութեամբ զբաղելու խնդրանքով: Յիշեցնենք,
որ Օգոստոս 8ին, Հայաստանի լեռնագնացութեան եւ լեռնային զբօսաշրջութեան դաշնակցութեան
հաւաքական խումբի հինգ լեռնագնացներ նուաճած են Գազպեգի գագաթը (5033 մեթր), այնտեղ պարզելով
հայոց Եռագոյնը: Լեռնագնացներէն երեքը իգական սեռի ներկայացուցիչներ են, որոնցմէ երկուքը
նոր կը սկսէին իրենց քայլերուն լեռնագնացութեան մէջ: Այսպիսով, մէկ ամսուան ընթացքին,
Լեռնագնացութեան եւ լեռնային զբօսաշրջութեան հայկական դաշնակցութիւնը կատարած է երկու
յիշատակելի վերելքներ՝ Տեմավենտ (5671 մեթր) եւ Գազպեգ (5033 մեթր):