Mbi të rinjtë vigjëlojnë 10 ndërmjetësues të veçantë pranë Zotit, jeta e të cilëve
përshkon historinë e Kishës në Spanjë, duke u shtrirë deri në Amerikën Latine, me
shën Rozën nga Lima e në Kishën universale, me të Lumin Gjon Pali II. Ata dëshmojnë
se “edhe sot, shenjtëria është e mundur”, siç thotë Papa Benedikti XVI, dhe u besojnë
të rinjve të Madridit mesazhin e thirrjes për këtë shenjtëri, që i përket çdo të Pagëzuari
në Krishtin. Të rinjtë e Madridit janë nën mbrojtjen e Zojës së Bekuar, Pajtore
e kryeqytetit spanjoll me titullin “Zoja jonë e Almudenës”. Fugurja e shën Marisë
La Real de la Almudena, nderuar prej shekujsh nga besimtarët, u gjet në vitin 1085
në një mur të qytetit dhe u vendos në ish-xhaminë, sot katedrale. Origjina e saj duhet
të jetë e fillimeve të shekullit VII, kur u fsheh me dekret nga kryeipeshkvi i Toledos,
për shkak të dyndjes së myslimanëve. Gjetja e saj nga mbreti Alfonsi VI gjatë “Reconquista”-s,
u shoqërua nga një ngjarje e mrekullueshme: ndërsa procesioni, i udhëhequr nga mbreti,
zgjatej përreth mureve, duke iu lutur Zotit të jepte një shenjë për të zbuluar fuguren,
disa gurë filluan të binin para një vrime në murin e një depoje gruri, ku ishte fshehur
statuja. Edhe emri vjen nga “almudd”, masa e lashtë arabe për grurin. Papa Piu X e
deklaroi Pajtore të Madridit në gusht 1908. Të rinjve të DBR-së do t’u jepet si
shembull edhe jeta e nëntë shenjtorëve të tjerë, të cilën mund ta lexojnë në dokumentet
që do të kenë në çantën e tyre të shpinës. Janë bashkëshortët shën Isidro Labrador
dhe shën Maria de la Cabeza, shenjti jezuit Injaci i Lojolës, shën Françesk Saveri,
Shën Gjoni i Avilës, Shën Gjoni i Kryqit, shën Tereza e Jezusit apo shën Tereza e
Avilës, Shën Rafael Arnàiz, shën Roza e Limës dhe i Lumi Gjon Pali II.