Mesazh i OKB-së për Ditën Ndërkombëtare të Rinisë, 12 gusht 2011
Dita Botërore e Rinisë në Madrid u parapri nga Dita Ndërkombëtare e Rinisë, festë
e organizuar nga OKB-ja për të rinjtë e mbarë globit më 12 gusht. Tema e këtij viti
ishte “Të ndryshojmë botën”. Në mesazhin e Sekretarit të Përgjithshëm, Ban Ki-mun
me këtë rast, thuhet se kjo nuk është vetëm tema e Ditës, por edhe aspirata e sotme
e brezit të ri. “Akoma tepër të rinj – shkruhet në mesazh – në krahasim me mëse
një miliard që numërohen në nivel botëror, nuk mund të arsimohen, nuk kanë liritë
dhe mundësitë, që do t’u takonin. Pavarësisht nga këto kufizime, të rinjtë po mobilizohen
për të ndërtuar një të ardhme më të mirë. Falë tyre, gjatë viteve të fundit, janë
arritur rezultate të jashtëzakonshme; janë rrëzuar diktatura e janë dhënë sinjale
shprese në shumë vende”. Ban Ki-mun vë në dukje aftësinë e të rinjve për të kapërcyer
barrierat, guximin për të përballuar sfidat, prirjen e tyre drejt drejtësisë e kundër
diskriminimit shoqëror, përpjekjet për të mbrojtur ambientin dhe për të përballuar
sëmundje të rrezikshme si Sida. Në ditën, që mbyll Vitin Ndërkombëtar të Rinisë, vazhdon
sekretari i OKB-së, bashkësia ndërkombëtare duhet të bashkëpunojë për t’u dhënë më
tepër mundësi të rinjve të jetojnë denjësisht e t’u garantojë të ardhmen, përmes punës
e zhvillimit ekonomik, edhe duke shfrytëzuar talentin dhe energjitë e të rinjve. Letra
e Ban Ki-mun u drejtohet në fund, vetë të rinjve: “Ju keni mundësinë ta ndryshoni
botën. Mos e lini t’ju ikë”.