Պենետիկտոս ԺԶ.ի 20րդ Առաքելական ճամբորդութիւնը։ Մատրիտ 18 - 21 Օգոստոս։ Պետական Հանգամանք

Պենետիկտոս ԺԶ սրբազան Քահանայապետի 20րդ առաքելական ճամբորդութիւնը որ 14րդը կը հադիսանայ եւրոպական ցամաքամասէն ներս, տեղի կ՛ունենայ յառաջիկայ 18 - 21 օգոստոս, Մատրիտի ՃՄՃ 2011-ի երիտասարդներու Համաշխարհային 26րդ օրուան առթիւ։
ՅՊԲ՝ նախորդ քահանայապետը Պենետիկտոս ԺԶ.ի, հինգ անգամ այցելած էր Սպանիան։ Առաջին անգամ 1982ին իսկ վերջինը իր մահէն երկու տարի առաջ 2003ին։
Սպանիան առաջին երկիրն է որ երկրորդ անգամուայ համար կը հիւրնկալէ երիտասարդութեան համաշխարհային օրը ։ Արդարեւ՝ երիտասարդութեան Միջազգային առաջին հաւաքը տեղի ունեցած էր 1989-ի Սպանիոյ՝ Սանդիակօ Տէ Գոմբոսդելլայի մէջ։
Պենետիկտոս ԺԶ Քահանայապետը երրոորդ անգամուայ համար կ̓այցելէ Սպանիան իսկ առաջին անգամուայ համար Մատրիտը։ Առաջինը` 2006-ին Ընտանիքի Օրուան առթիւ, իսկ երկրորդը 2010-ին Սակրատա ֆամիլիա տճարին օծման առթիւ։
Սրբազան Քահանայապետի այս այցելութիւնը սակայն, հակառակ միւս երկու այցելութիւններուն, ունի Պետական հանգամանք եւ այս ուղղութեամբ է որ նախատեսուած են` 19 օգոստոսին` երկրի պետական իշխանութեանց ու կառավարական իշխանութիւններու հետ հանդիպումներ։ Նորին Սրբութիւնը 19 օգոստոսի առաւօտեան պիտի ընդունուի Սպանիոյ Թագաւորին կողմէ Զարզուէլայ պալատին մէջ, իսկ յետ միջօրէին Պապական Առաքելական Նուիրակի Տան մօտ պիտի ընդունի Սպանիոյ Վարչապետը։ Սրբազան Քահանայապետը երկու հանդիպումներուն ընթացքին, առանձնական զրոյց պիտի ունենայ թէ' Թագաւորին եւ թէ' Վարչապետին հետ։