В'етнам: улады забіраюць у Касцёла зямлю

Улады В'етнама вырашылі забраць частку земляў, якія належаць Каталіцкаму Касцёлу, каб пабудаваць “парк памяці”, прысвечаны в'етнамскім салдатам, паведамляе “GaudiumPress”. Гэтая мера ўрада выклікала шырокі пратэст сярод в'етнамскіх католікаў: некалькі тысяч чалавек з жоўта-белымі папскімі сцягамі пратэставалі ў раёне Цау Рам на поўначы В'етнама.

Кс. Джозэф Нгуэн з дыяцэзіі Ханой з нагоды інцыдэнту, адзначыў, што “гэтыя падзеі з'яўляюцца прэлюдыяй іншых эпізодаў пераследу Касцёла ў В'етнаме”.

Раней камуністычныя ўлады ўжо падзялілі касцёльную зямлю ў дыяцэзіі Вінх на дзве часткі дарогай, якая злучае Ханой з домам-музеем першага кіраўніка Паўночнага В'етнама Хо Шы Міна. Падчас вайны шматлікія касцёльныя будынкі, якія з’яўляліся гістарычнай каштоўнасцю, былі разбураны. У цяперашні час улады не дазваляюць аднавіць іх. Прадстаўнікі дыяцэзіі Вінх неаднаразова звярталіся ў адпаведныя органы даць такі дазвол, але іх просьбы былі адхілены.