Беларусь: Касцёл адчыніў першы ў краіне прыватны Дом міласэрнасці
Добрая справа. У мястэчку
Лагішын у Пінскай дыяцэзіі пачаў працу першы касцёльны Дом міласэрнасці, які прымае
сталых і нямоглых людзей. Яшчэ 10 гадоў таму ў мясцовай каталіцкай парафіі святых
Пятра і Паўла з’явілася ідэя стварыць такую ўстанову. Ініцыятыву падтрымаў кардынал
Казімір Свёнтэк, а благаславіў сам папа Ян Павел ІІ.
Увесь гэты час ішло будаўніцтва,
і вось у Доме міласэрнасці, які разлічаны на 40 месцаў, пасяліліся першыя пастаяльцы.
Зараз там жывуць 19 чалавек – з Мінска, Оршы, але большасць – з Брэсцкай вобласці.
Усе яны асобы сталага ўзросту і не могуць самастойна сябе абслугоўваць. Цяпер за імі
пастаянна даглядае кваліфікаваны медыцынскі персанал, тут ёсць медкабінет і пакоі
для асоб, якія не могуць хадзіць. А калі хтосьці адчувае сябе зусім дрэнна – побач
бальніца. Але мэта гэтай установы не столькі лячэнне цела, колькі – душы: даць магчымасць
адчуць сябе патрэбным і не адзінокім. У Доме міласэрнасці ёсць свая капліца. Кожную
суботу мясцовы ксёндз адпраўляе св. Імшу. Дарэчы, прымаюць тут людзей рознага веравызнання.
Галоўны крытэрый – просьба аб дапамоге.
Лагішынскі Дом міласэрнасці – першая
ў краіне прыватная сацыяльная ўстанова – аказаўся вельмі запатрабаваным. Бо ў Беларусі
на жаль шмат адзінокіх і старых, многія жывуць у аддалёных вёсках. Зараз яшчэ 6 чалавек
рыхтуюць дакументы на пражыванне тут. У будучым Дом адчыніць дзверы таксама для маладых
маці, якія не маюць сродкаў на ўтрыманне або сталі ахвярамі насілля ў сям’і. Тут будуць
працаваць валанцёры з пасярод школьнікаў – каб ахапіць справамі міласэрнасці больш
людзей, якія маюць у гэтым патрэбу.