Presidenti i IOR-it, Goti Tedeski: për të dalë nga kriza, duhet vendosur njeriu në
qendër të ekonomisë
Zhvillimi ekonomik i SHBA-ve është më i ngadalshëm se parashikimet e rreziqet rriten.
Kështu, Federal Reserve (Banka Qendrore Amerikane) duke ridimensionuar perspektivat
ekonomike për të ardhmen, lajmëroi se interesat bankare do të mbeten në nivele minimale
të paktën deri në vitin 2013. Por a është zgjidhur problemi? Ekonomia – shkruan
Benedikti XVI në enciklikën “Caritas in Veritate” – “ka nevojë për etikën që të funksionojë
mirë; jo për një etikë çfarëdo, por për një etikë mike me njeriun”. Kriza ekonomike-financiare,
që po kalon globi, vërteton katërcipërisht këtë thënie. Të dëgjojmë komentin e ekonomistit
italian Etore Goti Tedeski, president i IOR-it (Institutit të Veprave Fetare) në Vatikan:
Mund të
jap edhe mendimin tim, por preferoj të nisem nga ç’thotë Papa në Enciklikën “Caritas
in Veritate”, kur shpjegon se sjellja e njerëzve, që administrojnë mjete ekonomike
e financiare, ka karakter moral. Njeriu, duke mos kuptuar më realitetin, duke mos
iu referuar më së vërtetës e duke kërkuar me çdo kusht liri absolute, e ka shndërruar
mjetin ekonomik në qëllim në vetvete, duke bërë, që ai të humbasë autonominë morale.
Kemi arritur në atë pikë sa mjeti privilegjon vetveten, në vend që të punojë për njeriun. Në
fakt, politika duket e pafuqishme para spekullimit financiar, nuk është në gjendje
t’i japë një shtysë ekonomisë… Do të thosha se politika, megjithëse jo në
Evropë, e ka shkaktuar këtë gjendje, sepse politika – sidomos ajo amerikane – e ka
mbajtur të lartë Prodhimin e Brendshëm Brut duke hyrë në borxh e duke i detyruar kështu
familjet të hyjnë në borxh, gati me 50% më shumë, në dhjetë vjet. E kjo, për të vrapuar
pas konsumizmit, që ishte i domosdoshëm për të rritur Prodhimin e Brendshëm Brut.
Sot, politika sheh se nuk mund t’i administrojë më këto situata, për një arsye shumë
të thjeshtë: nuk ekziston më një politikë e fuqishme! Ku ka sot në botë politikë të
fuqishme? Gjatë 40 vjetëve të fundit, menduam se ishin SHBA-të. Po a e qeverisin sot
SHBA-të ekonominë botërore? Jo, sepse bota është globalizuar! Më parë ekonomia u referohej
vendimeve dhe ndërhyrjeve të mëdha politike, por kjo sot është e kufizuar. Për
të mirën e përbashkët, shtetet duhet të gjejnë burime të reja financiare. Dikush flet
për një taksë mbi të ardhurat më të mëdha, ose mbi pasuritë më të mëdha. Është e drejtë
sipas jush? Një taksë mbi pasurinë do të shërbente vetëm për çkurajimin e frikësimin
e sistemit e të familjeve, që kanë kursyer. Nëse duam të marrim më shumë nga familjet,
në formën e taksave, përse të mos i përdorim këto fonde për zhvillimin ekonomik? Në
vend që të bëhet kjo, fondet përdoren për të zvogëluar borxhin publik, por kjo nuk
ka kuptim pa rritjen ekonomike. Borxhi, edhe nëse e çojmë në zero, do të vazhdojë
të rritet derisa të zgjidhen problemet e një vendi, pra derisa motorri i ekonomisë
ta çojë atë përpara.