Muzikë, që lind nga feja: kështu Papa në koncertin për 60-vjetorin e meshtarisë
Qe muzika e Bahut dhe e Vivaldit, protagonistja absolute e koncertit të mbrëmshëm
në Kastel Gandoldo, për të kremtuar 60-vjetorin e meshtarisë së Benediktit XVI dhe
të vëllait të tij, imzot Georg Racinger. Në podium u ngjitën Ensemble New Seasons
(Ansambli Sezonet e Reja), i përbërë nga gjashtë muzikantë të orkestrave të ndryshme
botërore, si edhe dy solistë, violinistja Arabela Shtajnbaher dhe oboisti Albreht
Majer, të cilët paraqitën edhe një pjesë nga Moxart, jashtë programit. Artistë, që
Papa i falenderoi për dhuratën e për ekzekutimin e shkëlqyer, që siç u tha, vjen “nga
zemra”: “Die beiden
Stücke von Vivaldi…” “Dy pjesët e Vivaldit që dëgjuam sonte – shpjegoi
Ati i Shenjtë – hyjnë në të ashtuquajturat “koncerte ripieno”, kompozuar për orkestër
harqesh e bas kontinuo, shumica e të cilëve kishte qëllim didaktik. Por, uniformiteti
i tyre arkitektonik nuk është kurrë monoton – shtoi Papa - duke nënvizuar se koncertet
e kompozitorit italian janë “shembull drite e bukurie, që përçon qetësi e gëzim”.
Një karakteristikë – vazhdoi Ati i Shenjtë – që e ka burimin në fenë e tij: “So
offenbart das Hören seiner Werke geistlicher Musik…” “Dëgjimi i veprave
të tij me muzikë kishtare nxjerr në pah shpirtin thellësisht fetar”. Kjo karakteristikë
– theksoi Papa – e bën të ngjashëm me Bahun, i cili në çdo dorëshkrim të vetin vendoste
edhe frazën “Soli Deo gloria” (Lavdia shkoftë vetëm në Zotin), duke na zbuluar kështu
konceptimin e tij fetar mbi artin. E duke vijuar të flasë për Bahun, Papa vuri në
dukje elementin thelbësor të karakterit të kompozitorit gjerman, që ishte feja e patundur
dhe përkushtimi i thellë ndaj Zotit. Këto qenë shtyllat në të cilat u mbështet e gjithë
jeta e tij: “Das Hören seiner Musik erinnert gleichsam…” “Dëgjimi
i muzikës së tij – përfundoi Papa – të kujton përroin e rrëmbyeshëm, ose një ndërtesë
të madhe, arkitektura e së cilës është tepër e harmonishme, gati-gati përpiqet të
riprodhojë harmoninë e përkryer, me të cilën Zoti ka vulosur gjithësinë”.