У хрысціян і мусульман рэлігія па-рознаму вызначае ідэнтычнасць асобы
Між ісламскім светам
і Захадам захоўваецца негатыўнае стэрэатыпнае ўспрыманне. Пра гэта сведчаць вынікі
свежага даследавання “Pew Research Center”. Многія жыхары краін Захаду бачаць у мусульманах
фанатычных і жорсткіх людзей. Між тым, мусульмане Блізкага Усходу і Азіі лічаць заходняе
грамадства эгаістычным, амаральным, прагным, жорсткім і фанатычным. Тым не менш, даследаванне
канстатуе ў ЗША і Еўропе своеасаблівую “адлігу”. Большасць прадстаўнікоў заходняга
грамадства ў параўнанні з 2006 г. бачаць адносіны з мусульманамі, у цэлым, пазітыўнымі.
Аднак, у мусульманскіх краінах сітуацыя не змянілася – там па сённяшні дзень крытычна
ацэньваюць заходні свет. Як і раней, мусульмане выказваюць больш неспрыяльнае меркаванне
аб хрысціянах, чым амерыканцы або еўрапейцы аб мусульманах.
Мусульманская грамадскасць
перакананая, што асноўная віна за адсутнасць росквіту іх краін ляжыць на заходніх
палітыках. Заходняе ж грамадскае меркаванне, як прычыну адсталасці многіх мусульманскіх
краін Блізкага Усходу і Азіі, на першае месца паставіла карупцыю, затым праблемы з
дэмакратыяй і адукацыяй. Але 14% прызналі таксама, што частковая адказнасць за цяжкасці
ў мусульманскіх краінах ляжыць на палітыцы, якая праводзіцца краінамі Захаду. Абодва
бакі аднагалосна выказалі турботу з нагоды пашырэння ісламскага экстрэмізму.
Пазіцыя
мусульман у адносінах да хрысціян кардынальна адрозніваецца ў залежнасці ад краіны.
У Ліване, які мае значнае хрысціянскае насельніцтва, амаль усе мусульмане станоўча
ўспрымаюць хрысціян. Таксама высокі рэйтынг у хрысціян сярод мусульман у Іарданіі
(57%), Інданезіі (52%) і Егіпта (48%). У той жа час, у Пакістане (16%) і Турцыі (6%)
- самы нізкі ўзровень лаяльнасці да вызнаўцаў Хрыста.
У выніку даследавання
атрымалася ўсталяваць, што ў хрысціян і мусульман рэлігія ў рознай ступені вызначае
ідэнтычнасць асобы. Большасць апытаных мусульман у першую чаргу атаясамліваюць сябе
з рэлігіяй. Гэта асабліва ярка выяўляецца ў Пакістане, дзе 94% апытаных лічаць сябе,
перш за ўсё, мусульманамі і ўжо потым пакістанцамі.
Большасць заходніх хрысціян
аддаюць перавагу нацыянальнай ідэнтычнасці. У Францыі 90% хрысціян выказаліся за гэты
пункт гледжання. Выключэннем з'яўляецца ЗША, дзе хрысціяне падзяліліся: 46% у першую
чаргу адчуваюць сябе амерыканцамі, а 46% – хрысціянамі.