Кардынал Канізарэс: не эканамічны крызіс, а крызіс чалавецтва
Прэфект Кангрэгацыі
Божага Культу і Дысцыпліны Сакрамэнтаў, кардынал Антоніа Канізарэс Ровэра, папярэдзіў
пра небяспеку адыходу ад Бога. “Асноўная праблема, якая стаіць перад Еўропай, не эканамічная,
а нашмат больш сур'ёзная, адмова ад Бога, якая вядзе да самазнішчэння”.
Падчас
летніх курсаў ва Універсітэце св. Вінцэнта ў іспанскай Валенсіі, прысвечаных сучаснасці
і будучыні Еўропы, кардынал Канізарэс выступіў з прамовай пад назвай “Хрысціяне ў
дэмакратыі”. Ён заклікаў вернікаў імкнуцца да пераадолення “маральнага зрыву, які
мы перажываем” і адновы “грамадства, заснаванага на нязменных этычных асновах”. Ён
падкрэсліў адказнасць хрысціян прымаць удзел у “новай евангелізацыі”, якая на яго
думку, з'яўляецца “самай лепшай службай, якую мы можам прапанаваць нашаму грамадству
каб змяніць і пераадолець гэты крызіс”.
У аснове сучаснай сітуацыі, сказаў
кардынал, ляжыць “не проста структурны або эканамічны крызіс, а, хутчэй, крызіс чалавецтва,
распад чалавецтва, маральны зрыў, які праходзіць па межах нашай асобы і мае на мэце
задавальненне любой цаной, задавальненне дзеля задавальнення, нават калі гэта азначае
знішчэнне кагосці. “Гэта сітуацыя павінна быць пераадолена”, - сказаў ён.
Кардынал
Канізарэс падкрэсліў неабходнасць абароны “ідэнтычнасці Еўропы”, асновамі якой заўсёды
“былі грэцкая філасофія, рымскае права і хрысціянская вера”. “Еўрапейская ідэнтычнасць”
неаддзельна ад годнасці чалавечай асобы як асновы ўсяго парадку”, - сказаў ён. “Без
павагі да чалавечай асобы, ні адно грамадства не мае будучыні”, - дадаў кардынал.
Прэфект Кангрэгацыі Божага Культу і Дысцыпліны Сакрамэнтаў сказаў, што, тым не
менш, ён мае “надзею” на будучыню, і заклікаў да “новага навяртання да Езуса Хрыста
пачынаючы з членаў Касцёла, якое адкрые вялікую будучыню для Еўропы”.
Кардынал
таксама звярнуўся да тэмы маючага адбыцца візіту папы Бэнэдыкта XVI у Іспанію на Сусветныя
дні моладзі. Святы Айцец на думку іерарха, прыяжджае, каб сказаць маладым людзям,
што трэба падняцца і ісці, каб пачаць пераадольваць глыбокі крызіс, які цягне іх у
бездань. Асабліва гэта датычыць маладых людзей у Іспаніі, дзе ўзровень беспрацоўя
сярод моладзі вельмі высокі.
“Папа прыяжджае, каб сказаць ім, што яны могуць
змяніць становішча рэчаў і што яны могуць мець лепшую будучыню, калі адкрываюць сябе
на тое, што прапануе Езус Хрыстус, на праўду, любоў, павагу да іншых, агульнае дабро,
смеласць і свабоду”, - сказаў кардынал Канізарэс.