Спякота, палатачны
гарадок і невялікія групы моладзі. Адны неспяша размясціліся на траве, другія – у
цяні дрэва, трэція – на лаўках. Вось такую атмасферу можна ўбачыць і адчуць у мястэчку
Івянец, недалёка ад Валожына – дакладна з 5 па 7 жніўня. У гэтыя дні тут праходзіць
ІІ Агульнабеларуская малітоўная сустрэча моладзі. Недзе – смех, недзе – ціхая размова,
усе чакаюць наступнага пункту праграмы. Якая, дарэчы, у гэтым годзе асабліва разнастайная.
Напярэданні адбылося ўрачыстае адкрыццё форуму, а сёння другі, мабыць самы насычаны
дзень. Прэзентацыю дыяцэзій сустракаюць шквалам апладысментаў.
Агульнабеларускай
сустрэчы чакалі роўна 3 гады. Першая прайшла ў Івянцы ў 2008 г., адначасова з XXIII
Сусветнымі днямі моладзі ў аўстралійскім Сіднэі. Пасля штогод тут збіралася моладзь,
але ў больш “вузкім” фармаце. І вось зараз зноў Івянец ператварыўся ў месца ўсеагульнай
малітвы, паяднання і разважанняў. Удзельнікамі сёлетняга свята сталі больш за 500
чалавек – пілігрымы з усёй Беларусі.
Канцэр семінарыйных гуртоў, некалькі
канферэнцый, дыялог з біскупамі, круглыя сталы на актуальныя тэмы – усё гэта змястоўны
акцэнт сустрэчы. Як адзначыў Мітрапаліт Мінска-Магілёўскі, Апостальскі Адміністратар
Пінскай дыяцэзіі арцыбіскуп Тадэвуш Кандрусевіч, галоўнае – гэта пачуццё веры, сёння
чалавек перажывае крызіс веры і трэба шукаць сродкі, каб яе вярнуць.
ІІ Агульнабеларуская
сустрэча адзначана шматлікімі навінкамі. Напрыклад, прамой інтэрнэт-трансляцыяй мерапрыемстваў
на сайце catholic.by. У мікрааўтобусе ўвесь час працуе рэжысёрская група, а нечы аўтамабіль
стаў каментатарскай рубкай. Ёсць у Івянца і свае асабістыя традыцыі, якім ужо шмат
гадоў. За сцэнай праходзяць рэпетыцыі “Музычнай майстэрні” – яна і задае тон гэтаму
форуму. Яе арганізатар – вядомы польскі музыкант і журналіст Ян Паспяшальскі. “Гэта
супольнае перажыванне служэння ў Касцёле праз спеў, музыку, танец. Мы паказваем, што
быць хрысціянінам – гэта справа людзей не толькі сталага ўзросту. Быць хрысціянінам
– гэта найбольшая прыгода жыцця, якую варта перажыць, захапляльная, хоць і страшэнна
складаная”, - адзначыў польскі журналіст.
Канцэрт “Музычнай майстэрні”
завершыць дзень сённяшні, а заўтра – св. Імша, працэсія і благаслаўленне беларускіх
пілігрымаў, якія ўжо ў панядзелак ад’язджаюць у іспанскі Мадрыд на Сусветныя дні моладзі.
Перажываць гэтае свята разам з папам Бэнэдыктам XVI, як чакаецца, будзе больш за 1
млн. маладых людзей з усіх кантынентаў, беларуская дэлегацыя налічвае 700 чалавек.