Беларусь: Невялікае мястэчка стала “беларускім Мадрыдам”
5 жніўня ў Івянцы
пачынаецца ІІ Агульнабеларуская сустрэча моладзі. Мерапрыемства праходзіць пад назвай
“Укаранёныя і збудуваныя на Хрысце, моцныя ў веры”. Яно прымеркавана да Сусветных
дзён моладзі, якія пройдуць у Мадрыдзе 16-21 жніўня, і 20-годдзя заснавання Мінска-Магілёўскай
Мітраполіі. Першы такога роду форум адбыўся ў тым жа Івянцы ў 2008 г. і быў прымеркаваны
да сусветнай сустрэчы моладзі ў аўстралійскім Сіднэі. Тады адбыўся тэлемост які звязаў
буйны аўстралійскі горад і невялікае беларускае мястэчка.
Трэба адзначыць,
што моладзевыя мерапрыемствы ў Івянцы сёлета пачаліся ўжо 1 жніўня. Тут каля 300 маладых
людзей прымаюць удзел у “Музычнай майстэрні” – школе літургічнага спеву. Мэта “Майстэрні”
у тым, каб падзяліцца вопытам у сферы літургічнай музыкі і далучыць маладых людзей
да творчасці. Моладзь вучыцца спяваць, граць на інструментах, знаёміцца з асновамі
тэатральнага мастацтва. Прэзентацыя твораў, якія маладыя людзі вывучаць падчас “школы”
адбудзецца менавіта падчас Агульнабеларускай стрэчы моладзі. Акрамя таго, удзельнікі
“Майстэрні” будуць суправаджаць сваім спевам набажэнствы, якія будуць праходзіць у
рамках гэтага моладзевага форуму.
Сёлетняя сустрэча моладзі мае таксама інтэрактыўны
характар. Падчас яе можна будзе непасрэдна і адкрыта весці дыялог з біскупамі: задаць
пытанні іерархам і пачуць іх адказы. Пытанні моладзь магла дасылаць на працягу некалькіх
месяцаў на спецыяльны адрас электроннай пошты.
Форум мае таксама інтэлектуальную
накіраванасць, падчас яго пройдуць так званыя “круглыя сталы”: у рамках якіх адбудуцца
дыскусіі на тэмы, цікавячыя моладзь: валанцёрства і дабрачыннасць, пакліканне, хрысціянская
сям’я, Касцёл і СМІ, рэлігія і мастацтва, а таксама, небяспека сект. Маладыя людзі
змогуць выбраць адну з прапанаваных тэм і разам са спецыялістамі абмеркаваць яе.
Нарэшце,
праграма ІІ Агульнабеларускай сустрэчы моладзі ўключае ў сябе катэхезы, малітвы, удзел
у св. Імшы, а таксама канцэрты і прэзентацыі. Напрыканцы форума адбудзецца асвячэнне
фігуры Яна Паўла ІІ, пасадка “дрэва Агульнабеларускай сустрэчы моладзі” і благаслаўленне
пілігрымаў, якія адправяцца праз некалькі дзён у Мадрыд на Сусветныя дні моладзі.