Papa inkurajon fëmijët e Fukushimës, katolikët japonezë kujtojnë tmerrin bërthamor
Njëzetë fëmijë të shkollave fillore të Ofunatit, të goditur nga rrezatimi radioaktiv
pas aksidentit në centralin bërthamor të Fukushimës marsin e kaluar, morën pjesë në
Audiencën e Përgjithshme që u mbajt dje paradite në sheshin qendror të Kastelgandolfit.
Fëmijët “i premtuan Papës – shkruan gazeta l’Osservatore Romano – që nuk do të dorëzohet
kurrë” dhe i kanë rrëfyer e ripohuar tërë “vullnetin e tyre për të jetuar e për t’u
rilindur”. Në një kartolinë, njofton gazeta vatikanase, fëmijët japonezë ripohuan
edhe me shkrim angazhimin e tyre për “të mos u dorëzuar kurrë”, për të mos hequr dorë
nga shpresa e ringjalljes, nga shpresa e “rindërtimit të qytetit që është gjithnjë
më i bukuri” për ta, për “të mos humbur buzëqeshjen”, për “të bërë gjithçka që të
lulëzojë lulja e shpresës”. Pikërisht për të simbolizuar këtë shpresë, nënvizon artikulli,
“kryetari i bashkisë së Hokutos, Masashi Shirakura, dhuroi një degë të qershisë dymijëvjeçare.
Një vullnet i ringjalljes që, shpjegon, është i njëjtë me atë që bëri të çonim lartë
kokën në Nagasaki pas bombardimit bërthamor të 9 gushtit 1945. Qenë pikërisht lulet
që u ringjallen vetëm tridhjetë ditë pas atij tmerri, duke befasuar të gjithë e duke
u bërë kështu simbol shprese”