Ofensivë e re e ushtrisë kundër protestuesve në Hama. Tanket qëllojnë kundër shtëpive
Ofensivë e re e ushtrisë siriane në qytetin Hama, ku tanket kanë pushtuar qendrën,
në ditën e katërt të sulmeve mbi popullsinë civile. Të gjitha linjat e komunikimit
janë ndërprerë. Sipas dëshmitarëve nga vendi, cituar nga gazeta britanike “The Guardian”,
tanket bombardojnë rëndë shtëpi e forcat e sigurisë gjuajnë me bomba brenda banesave.
Ka ndeshje të ashpra me armë nëpër rrugë. Qeveria e presidentit Bashar al-Asad
i ka duart e lira për të vepruar sipas qejfit, ndërsa bashkësia ndërkombëtare i dënon
masakrat e saj vetëm me fjalë. Vërtet, në Këshillin e Sigurimit të OKB-së, akoma nuk
është arritur marrëveshja për një rezolutë, që të përcaktojë ç’duhet bërë me Sirinë.
Moska dhe Pekini janë kundër sanksioneve, pavarësisht se e pranojnë situatën e vështirë
siriane, që po e çon vendin drejt luftës civile. Preteksti për sulmet e sotme në Hama
ishin akuzat e zyrtarëve sirianë se të ashtuquajturit “grupe të armatosura terroristësh”
kanë rrëmbyer dy policë e kanë sulmuar selitë e institucioneve publike të qytetit.