Кардынал Бэртонэ: без Эўхарыстыі і споведзі выхаванне немагчыма
1 жніўня кардынал
Тарчызіо Бэртонэ, Дзяржсакратар Яго Святасці Бэнэдыкта XVI, адзначае 20 гадоў біскупскага
пасвячэння. З гэтай нагоды ён узначаліў св. Імшу, якая прайшла ў катэдральным касцёле
Верчэллі, горада на поўначы Італіі, дзе ў 1991 г. кс. Тарчызіо Бэртонэ атрымаў біскупскую
сакру.
У сваёй кароткай прамове, іерарх адзначыў, што яму вельмі прыемна вярнуцца
ў тое месца, адкуль пачыналася яго святарскае і біскупскае служэнне, каб падзякаваць
Пану за шматлікія ласкі, якія ён атрымаў у жыцці. Кардынал запэўніў, што заўсёды памятае
ў малітве аб мясцовай каталіцкай супольнасці і асабліва аб Эўхарыстычным кангрэсе,
які пройдзе тут у верасні 2011 г. пад назвай “Калі эўхарыстычная супольнасць становіцца
супольнасцю адукацыйнай”.
“Згодна са словамі св. Яна Боска, агульнапрызнанага
вялікага выхавацеля, Эўхарыстыя і споведзь, з’яўляюцца двума самымі важнымі элементамі
адукацыі. Як салезіянін, я не магу не паўтарыць яго словы: “Шмат гаворыцца аб розных
адукацыйных сістэмах, але я не бачу больш надзейнага фундамента, акрамя таго, каб
часта спавядацца і прымаць св. Камунію. Калі выключыць гэтыя два элементы, узровень
маральнасці застанецца нізкім”, - сказаў кардынал Бэртонэ. “Навучаць супольнаму дабру
і спрыяць таму, каб грамаскае жыццё праходзіла і ўзрастала ў якасці ў мірных умовах
– гэта сапраўдная мэта кожнага адукацыйнага праекта. Таму не будзем забывацца аб касцёльнай
прапанове адносна пабудовы грамадскага дабрабыту і пазітыўных адносін вакол нядзельнай
Эўхарыстыі, крыніцы і кульмінацыі жыцця Касцёла”, - заклікаў кардынал Дзяржсакратар.