Сусветныя дні моладзі - момант асабістай сустрэчы з Богам

“Калі ў жніўні 1989 г., падчас Сусветных дзён моладзі ў Санцьяга дэ Кампастэла, Мігуэль Дэлгада Галінда, малады адвакат, які стаяў сярод тысяч іншых людзей, што рытмічна выкрыквалі імя Яна Паўла ІІ, выражаючы сваю любоў да Пантыфіка, ён і не мог падумаць што ў будучыні будзе стаяць з іншага боку сцэны, ужо як падсакратар Папскай рады па справах свецкіх”, - так пачынаецца інтэрв’ю з кс. Дэлгада апублікаванае сёння на старонках “L’Osservatore Romano”. 18 чэрвеня 2011г. гэты іспанскі святар быў прызначаны Бэнэдыктам XVI на пасаду падсакратара Рады па справах свецкіх і цяпер займаецца падрыхтоўкай моладзевага форума ў Мадрыдзе.

Член Папскай прэлатуры “Opus Dei”, кс. Дэлгада адзначае, што Сусветныя дні моладзі не з’яўляюцца “каталіцкім Вудстокам, шматкультурным фестывалем моладзі ад якога не застанецца і следу пасля таго, як выключыцца апошні пражэктар”. “Ён з’яўляецца, негледзячы на шматлікую колькасць людзей, момантам асабістай сустрэчы з Хрыстом, якая можа перамяніць жыццё таго, хто ў ёй удзельнічае”, - адзначыў святар. “Канешне, такая сустрэча патрабуе падрыхтоўкі, якая пачынаецца з пасланнем, што Папа піша кожны год да моладзі з нагоды святкавання Пальмовай нядзелі. Існуе шмат парафій, асацыяцый, касцёльных рухаў, моладзевых груп, якія арганізуюць вывучэнне і разважанне над пасланнем Пантыфіка. Але найбольш каштоўныя плёны прыносіць асабісты кантакт паміж маладым чалавекам і Богам”, - адзначыў кс. Даленга.

Гаворачы аб ролі свецкіх у жыцці Касцёла, святар падкрэсліў, што менавіта свецкія з’яўляюцца большасцю ў Касцёле, і таму яны заслугоўваюць найбольшай увагі з боку пастыраў. “Перад намі заўсёды стаіць выклік адкрыць і па-сапраўднаму ацаніць іх пакліканне, укаранёнае ў сакрамэнтах хрысціянскай ініцыяцыі. Яно павінна заўсёды падтрымлівацца адпаведным выхаваннем, якое зробіць свецкіх больш свядомымі свайму пакліканню да евангелізацыі, г.зн., нясення Хрыста іншым”, сказаў член Папскай рады па справах свецкіх.